«Batys» óńirlik qolbasshylyǵy 5517 áskerı bóliminiń 60-tan astam áskerı qyzmetshisi men 2 arnaıy tehnıkasy áskerı Asan eldi mekeninde sý tasqynyn bógeý jumystaryna qatysty. Al 6655 áskerı bóliminiń qyzmetkerleri tórt aýysym boıynsha 17 tehnıkanyń kómegimen Aqtóbe oblysyndaǵy Kırpıchnyı kentine kómek berip jatyr.
Pavlodar oblysyna qarasty Aqtoǵaı aýdanynyń Sholaqsor kentinde Sileti ózeni arnasynan asýyna baılanysty 5512 áskerı bóliminiń áskerı qyzmetshileri halyqqa kómektesý jáne sý tasqynynyń aldyn alý úshin shuǵyl túrde aýdanǵa bet aldy. Sondaı-aq olar Jalaýly eldi mekenindegi sý tasqynyna qarsy is-sharalardy atqarýǵa jumyldyryldy. Ulandyqtar erigen qar sýyna qarsy bógetter turǵyzyp, sý tasqynynyń aldyn alý úshin túrli amal jasap jatyr.
Buǵan qosa, Temirtaý qalasynyń 5516 áskerı bóliminiń 125 áskerı qyzmetshisi men 6 tehnıkasy, Qostanaı qalasyndaǵy Ulttyq ulan polkiniń 100 áskerı qyzmetshisi jáne 8 tehnıkasy, Petropavl qalasyndaǵy 6637 áskerı bóliminiń 50 áskerı qyzmetshisi men 7 tehnıkasy elimizdiń ár óńirindegi jaǵdaıdy retteýge atsalysyp jatyr.
Qaraǵandy oblysynyń iri sý qoımalarynda (Samarqand, Yntymaq, Sherýbaı-Nura) sý kóleminiń ulǵaıýyna baılanysty Abaı, Buqar jyraý jáne Nura aýdandarynyń 28 eldi mekeninde qum toltyrylǵan qaptardan bóget turǵyzý jumystary qolǵa alynǵan. Buǵan Qaraǵandy qalasynyń 5451 áskerı bóliminiń 50-ge jýyq áskerı qyzmetshisi men 4 arnaıy tehnıkasy qosyldy.
– Ulttyq ulannyń áskerı qyzmetshilerine tehnogendik, tabıǵı, áleýmettik sıpattaǵy tótenshe jaǵdaılardyń saldarlaryn joıýǵa qatysý mindeti júktelgen. Sondyqtan kýrsanttar kez kelgen ýaqytta halqymyzǵa kómek kórsetýge daıyn, – dep atap ótti 2 oqý batalony komandıriniń tárbıe jáne áleýmettik-quqyqtyq jumys jónindegi orynbasary, podpolkovnık Álimjan Tasmaǵambetov.
