Foto. Senattyń baspasóz qyzmeti
Palata Tóraǵasy aldymen, Memleket basshysy Qasym-Jomart Toqaevtyń kóńil aıtý jedelhatyn oqyp berdi.
«О́mirbek Baıgeldiuly egemendiktiń berik irgetasyn qalasqan tuǵyrly tulǵa, Otanymyzdyń damýyna qajyrly eńbek sińirgen ultjandy azamat boldy. Qazaqstan Respýblıkasy Parlamentiniń qalyptasýyna zor úles qosty. Ǵıbratty ǵumyr ıesi óziniń naǵyz parasatty tulǵaǵa tán qadir-qasıetimen barsha jurttyń syı-qurmetine bólendi. Sońyna jarqyn iz qaldyrǵan О́mirbek Baıgeldiulynyń esimi men beınesi halqymyzdyń jadynda máńgi saqtalady», delingen jedelhatta.
О́z sózinde Máýlen Áshimbaev О́mirbek Baıgeldiniń jan-jaqty jáne azamattyq ustanymy berik tulǵa bolǵanyn atap ótti. Ol ulttyq parlamentarızmniń qalyptasýy men damýyna úlken úles qosty. О́mirbek Baıgeldi Parlament Senatynda qyzmet atqarǵan kezeńde qabyldanǵan zańdar Qazaqstannyń memlekettiligi men Táýelsizdigin nyǵaıtýǵa tikeleı áser etkeni anyq. Palata Spıkeri osy istiń bárinde qaıratker tulǵa naǵyz otanshyldyqtyń, ultqa qyzmet etýdiń ozyq úlgisin kórsetkenin tilge tıek etti.
Qaraly jıynǵa Parlament Májilisiniń Tóraǵasy Erlan Qoshanov, Premer-mınıstrdiń orynbasary Tamara Dúısenova, Jambyl oblysynyń ákimi Erbol Qarashókeev, Parlament Palatalarynyń depýtattary, memleket jáne qoǵam qaıratkerleri jáne BAQ ókilderi qatysty.
Aıta ketsek, О́mirbek Baıgeldi Senatta 16 jyldan astam ýaqyt eńbek etti. Ol Parlament Senatynyń birinshi, ekinshi, úshinshi, tórtinshi shaqyrylymdarynda depýtat boldy.
О́mirbek Baıgeldi Astana mańyndaǵy Ulttyq panteonǵa jerlenedi. Atalǵan jerge kórnekti memleket qaıratkerleri, ǵylym jáne mádenıet ókilderi, Qazaqstannyń damýyna aıtarlyqtaı úles qosqan tulǵalar jerlenetini belgili.
