Ǵalymnyń mereıtoıyn atap ótýge arnalǵan jalpyrespýblıkalyq jospar ótken jyly bekitilgen. Osy qujat aıasynda 12 sáýir kúni, saǵat 14:00-de Astana qalasyndaǵy Qanysh Sátbaev kóshesi boıyndaǵy akademıktiń záýlim eskertkishine («Qazaqstan» sport kesheni mańy) gúl shoqtary qoıylady jáne osy eskertkish aldyna ǵulama Máshhúr Júsiptiń jas Qanyshqa 22 jasynda bergen batasy jazylǵan granıt belgitastyń ashylý saltanaty ótedi. Is-sharaǵa Úkimet músheleri, Senat jáne Májilis depýtattary, mınıstrler men qala jáne aımaq ákimderi, Prezıdent janyndaǵy Ulttyq Ǵylym akademııasy basshylyǵy men Ulttyq ǵylymı keńestiń músheleri, memleket jáne qoǵam qaıratkerleri, Eýrazııa Ulttyq ýnıversıtetiniń professor-oqytýshylar quramy jáne qala turǵyndary qatysady dep kútilip otyr.
Sondaı-aq is-sharanyń jalǵasy Q.Sátbaev kóshesindegi alǵashqy akademıktiń barelefiniń ashylýy, odan keıin L.Gýmılev atyndaǵy EUÝ-nde «Planetarlyq deńgeıdegi tulǵa» atty kórmemen ulasady. Saǵat 15:00-de «Qanysh Sátbaev – ult maqtanyshy» atty halyqaralyq ǵylymı-praktıkalyq konferensııa bastalady.
Aıta ketý kerek, Qanysh Sátbaev – esimi memleket tarıhynda altyn árippen jazylǵan Ulttyń birtýar perzenti, IýNESKO deńgeıinde 100-jyldyǵy toılanǵan asa kórnekti geolog-ǵalymy, memleket jáne qoǵam qaıratkeri, HH ǵasyr ǵulamasy.
Ǵulama-ǵalymnyń mereıtoıyn atap ótýge arnalǵan Úkimettiń jalpyrespýblıkalyq jospary aıasynda bıyl respýblıkalyq jáne halyqaralyq deńgeıdegi 50-den astam is-shara ótedi.
