Jergilikti atqarýshy organdardyń tizimine sáıkes, zardap shekkender sanatyna jatqyzylǵan barlyq azamatqa nesıe boıynsha tólem avtomatty túrde 2024 jyldyń 1 sáýiri men 30 maýsym aralyǵynda 3 aı merzimge keıinge qaldyrylady. Ári osyǵan baılanysty keshiktirilgen nesıege aıyppul men ósimpul eseptelmeıdi.
Bankter men MQU múlikke jáne jeke sharýashylyqqa, qaryz alýshylardyń kiristeri men qarjylyq jaǵdaıyna keltirilgen zalaldyń áserin baǵalaý úshin jeke taldaý júrgizip, nesıe boıynsha qosymsha derbes qoldaý kórsetý sharalaryn aıqyndaıdy. Búginde nesıe uıymdarynyń resmı saıty men áleýmettik jelidegi akkaýnttarynda tıisti ótinishti berýdiń naqty algorıtmderi jáne qaryzdy qaıta qurylymdaýdy júrgizý tártibi jarııalana bastady. Bul úderisti jeńildetý úshin bankter men MQU zardap shekkenderdiń ótinishin onlaın qabyldaýdy da josparlaǵan.
Eldegi jekelegen kompanııalar men qorlar, sondaı-aq kásipkerlerdiń tasqynnan taryqqan elge kómek retinde qomaqty qarajat aýdarýy da úlken qoldaý bolyp otyr.
Qazir úlken somada qarjy aýdarǵan kompanııalardyń eń aldynda «Samuryq-Qazyna» AQ tur. Kompanııa qorynan 15 mlrd teńge bólingen. Odan keıin «Qazaqstan halqyna» qory – 5 mlrd, «Teńizshevroıl» – 2 mlrd teńge bólgen. «Shevron» korporasııasy – 3 mln dollar (shamamen 1,3 mlrd teńge), Freedom Holding – 1 mlrd teńge, Halyk Bank pen «Halyq» qory kómek retinde óz qarajatynan 1 mlrd teńge bólý týraly birlesken sheshim qabyldady. «Air Astana» áýe kompanııasy – 1 mlrd, «Qazaqmys» pen KAZ Minerals 800 mln teńge aýdarǵan. Bolat О́temuratov qory 680 mln teńge bóldi. «Astana Motors» pen BI Group holdıngi 500 mln teńge aýdardy.
Taǵy osy kólemdegi (500 mln teńge) qarjyny «Allur», «QazTehna» jáne «Qarmet» kompanııalary men «Eurasian Resources Group bólipti». Sonymen qatar «Jusan Bank» – 300 mln teńge, «Sentr Kredıt banki» – 200 mln teńge, Bank RBK – 150 mln teńge, «Kaspi Bank» – 120 mln teńge «Eýrazııalyq bank» 20 mln teńge qarjy qarastyrǵan.
Aıtpaqshy, osynaý qıynshylyqta eń az soma bólgen «Kaspi Bank» osy jyldyń alǵashqy eki aıynda 69 mlrd teńge paıda tapqan. Eldegi 10 iri bank reıtınginde ekinshi orynda turǵanyna qaramastan, kómek boıynsha eń az somany bóldi jáne kópshiliktiń synyna qaldy. Osydan keıin tasqynǵa qatysty taǵy 500 mln teńge bólýge sheshim qabyldaǵan.
Kcell jáne Beeline uıaly baılanys operatorlary sý tasqynynan zardap shekken azamattarǵa tegin mınýttar, ınternet jáne SMS beretinin habarlady. Al «QazMunaıGaz» ınfraqurylymdy qalpyna keltirýdi óz moınyna alatynyn málimdep otyr.
Búginde qıyndyqqa ushyraǵan el turǵyndaryna qajetti azyq-túlik pen dári-dármek qory da ózge óńirlerden tolassyz kelip jatyr. Buǵan qosa «Biz Birgemiz Qazaqstan» qaıyrymdylyq qory birneshe kún ishinde 55 myń el turǵynynan 80 mln teńgege jýyq aqsha jınaǵan edi. Qazir bul soma 100 mln teńgeden asqan.
