Foto: senate.parlam.kz
«Q.Toqaev «Egemen Qazaqstan» gazetine bergen suhbatynda: «Men «zań jáne tártip» qaǵıdatyn nyǵaıtýdy jaqtaımyn, otbasylyq-turmystyq zorlyq-zombylyq úshin jazany qatańdatýdy qoldaımyn», dedi. Memleket basshysynyń ustanymy aıqyn: zańnyń ústemdigin belgileý jáne zań normalary saqtalatyn ádiletti qoǵam qurý. Zań men tártipti ornatý onyń saılaýaldy baǵdarlamasynyń negizi deýge bolady. Prezıdent usynǵan «zań jáne tártip» qaǵıdaty barlyq máseleler quqyqtyq salada sheshilýi kerek degendi ańǵartady. Bul qaǵıdattyń eki qyry bar. Birinshisi - «zań bar jerde tártip bar». Ekinshisi - «zań buzylmaǵan jerde tártip bar». Demek, qylmystyń aldyn alý asa mańyzdy», dep jazdy Nurtóre Júsip Facebook jelisinde.
Prezıdent «QR-nyń keıbir zańnamalyq aktilerine áıelder quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly», «QR-nyń Ákimshilik quqyq buzýshylyq týraly kodeksine áıelder quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zańdarǵa qol qoıǵany málim.
«Qujat Memleket basshysynyń áıelder men balalarǵa qatysty zorlyq-zombylyqtyń kez kelgen kórinisi úshin jaýapkershilikti qatańdatý, otbasy ınstıtýtyn nyǵaıtý jáne kámeletke tolmaǵandardyń qaýipsizdigin qamtamasyz etý, onyń ishinde bala quqyqtary jónindegi ýákildiń qyzmetin odan ári jetildirý jónindegi tapsyrmalaryn iske asyrýǵa baǵyttalyp otyr. Zań shyǵarýshy organ qoǵamnyń suranysyna sáıkes jaza túrlerin anyqtady. Qatań jaza – qylmystyń aldyn alýdyń jáne qoǵamdy qaýipti qylmyskerlerden qorǵaýdyń tıimdi ádisi», dep jazdy N.Júsip.
Senator atalǵan zańnyń negizgi maqsaty jazalaý emes, aldyn alý sıpatyna ıe ekenin aıtyp, engizilgen túzetýler balalardyń quqyqtyq sanasyn qalyptastyrýǵa arnalǵanyn, balalardy qorqytý jáne kıbberbýlıng úshin ákimshilik jaýapkershilik engizilgenin, kúndelikti ómirde kámeletke tolmaǵandar arasynda býllıng jıi kezdesetinin tilge tıek etti.
«Osyǵan baılanysty bilim berý uıymynda uzaq ýaqyt boıy býllıngke qarsy turýdyń zańdy tetikteri bolǵan joq. Olar tek profılaktıkalyq sóılesýmen jáne mektepishilik esepke alýmen shektelýge májbúr boldy», dep jazǵan senator.
«Zań kámeletke tolmaǵandardyń býllıng úshin jaýapkershiligin qarastyrmaıdy, biraq ata-analarǵa balalarynyń áreketteri úshin naqty jaza taǵaıyndaıdy, bul tejeý mehanızmi bolýy kerek. Máselen, eger bul áreketti 12 jastan 16 jasqa deıingi kámeletke tolmaǵandar jasasa – eskertý nemese 10 AEK aıyppul ata-analaryna nemese olardy almastyratyn adamdarǵa salynady. Mundaı jaýapkershiliktiń paıda bolýy balalarǵa da, ata-analarǵa da, búkil qoǵamǵa da bul máselege baıypty qaraýǵa múmkindik beredi. Zań jumys isteýi kerek. Ol úshin elde jappaı tártip ornyǵýy tıis!», dep túıindedi Senat depýtaty.
