Foto: Ulttyq ulan
Qazir Batys Qazaqstan jáne Atyraý oblystarynda sý basý qaýpi óte joǵary. Apattyń aldyn alý úshin ulandyqtar sý basqan aýdandardyń turǵyndaryn evakýasııalaýmen belsendi shuǵyldanyp, turǵyn alaptarda qum salynǵan qaptardan bóget turǵyzyp jatyr. Máselen, Batys Qazaqstan oblysynyń eldi mekenderinen turǵyndardy evakýasııalaý barysynda Ulttyq ulannyń 5517 áskerı bóliminiń áskerı qyzmetshisi Máýlen Marlenov sý ortasynda qalǵan adamdardy der kezinde qutqardy. Ol sý tasqynynyń ortasynda turyp qalǵan júk kóliginen 30 adamdy shyǵaryp, qaýipsiz aımaqqa evakýasııalady.
Oral qalasyndaǵy Ulttyq ulannyń jergilikti polkine 300 adamnan turatyn Shymkent jedel brıgadasynyń jeke quramy jáne Qyzylordadan 200 sarbaz kómekke keldi. Atyraý oblysynda da sý tasqyny jaǵdaıy kúrdeli bolyp tur. Atyraý qalasyndaǵy 5546 áskerı bóliminiń 120-dan astam sarbazy polısııa qyzmetkerlerimen birlesip, Qulsary qalasynyń kóshelerinde ıesiz úılerdegi dúnıe-múlikti tonaýǵa jol bermeý boıynsha qyzmet atqaryp júr. Sondaı-aq jeke quramnyń bir bóligi gýmanıtarlyq júkterdi túsirýge, jaǵalaýdy nyǵaıtý jumystaryna tartyldy. Olarǵa Qaraǵandy qalasynda ornalasqan 5451 áskerı bóliminen 500 jaýynger kómekke keldi. Aqtóbe men Qostanaıda sý tasqynyna qarsy is-sharalar men qoǵamdyq tártipti qorǵaý úshin jeke quramdy tartý jalǵasyp jatyr. Jergilikti 6655 jáne 6697 áskerı bólimderi osy maqsattar úshin 400-den asa áskerı qyzmetshi bóldi.
Elimizdiń soltústik óńirinde de qaýip seıilgen joq. Petropavlǵa áskerı akademııanyń 400 kýrsantyna jáne jergilikti Ulttyq ulan polkiniń 200 sarbazyna astanalyq sarbazdar kómekke keldi. Sý tasqyny bastalǵannan beri Ulttyq ulannyń 3 myńnan asa jaýyngeri, 145 avtomobıl tehnıkasy jáne 7 áýe transporty iske aralasty. 1 644 adam evakýasııalanyp, ınertti materıaldary bar 462 myń qapshyq daıyndalyp, tıisti jerlerge tóseldi jáne 110 tonna gýmanıtarlyq kómek jetkizildi.
