Búginde dıqandar topyraq ylǵaly qurǵamaı turyp, súdiger, kúzdik, kópjyldyq shóp tyrmalaý jáne jer jyrtý sııaqty dala jumystaryna bilek sybana kirisedi. Sala mamandary da sharýany bir jaǵadan bas, bir jeńnen qol shyǵara otyryp uıymdastyryp, sapaly ótkizýge tyrysady. Naýqandyq jumystardy minsiz atqarýǵa kúreńbeldikter de atsalysyp jatyr. Aýdandyq aýyl sharýashylyǵy jáne jer qatynastary bóliminiń basshysy Mádı Saýlhanovtyń bergen málimetine júginsek, óńirde kóktemgi dala jumystaryna ázirlik qyzý júrýde. Traktor, tuqym sepkish, qopsytqysh, tyrma, soqanyń bári dala tósin dúbirge bóleýge daıyn. Aqaýy barlary qajetinshe jóndeýden ótip, saqadaı saı tur.
Jospar boıynsha 117 653,4 gektarǵa aýyl sharýashylyǵy daqyldary egiledi. Onyń ishinde kúzdik bıdaı jáne jazdyq arpa, bıdaı men suly, dándik júgeri, qaraqumyq sııaqty dándi daqyldar bar. Sonymen birge 1313,4 gektarǵa kartop, 591 gektarǵa maıly daqyldar sebiledi. Maqsary, kúnbaǵys, zyǵyr daqyldary da osynyń ishinde. Qant qyzylshasynyń tuqymy 700 gektarǵa, baqshalyq daqyldar 387,5 gektarǵa egiledi dep josparlanyp otyr.
Kóktemgi dala jumystaryn júrgizetin dıqandar úshin janar-jaǵarmaı aýadaı qajet. Bıyl 94 sharýa qojalyǵynan 868 tonna kepildi janar-jaǵarmaıǵa ótinim túsken. Onyń ár lıtri 250 teńgeden belgilenipti. Berekeni tasytyp, mol ónimge qol jetkizý úshin mıneraldy tyńaıtqyshtardyń alar orny erekshe. Sol sebepti, onyń kólemi anyqtalyp, nátıjesinde 8513,1 tonna mıneraldy tyńaıtqysh satyp alý qajettigi belgili bolǵan. 508,7 tonnasy jazdyq bıdaı, 7 947,4 tonnasy jazdyq arpa, qalǵany júgerige arnalmaq.
Aýylsharýashylyq taýar óndirýshilerine jan-jaqty qoldaý kórsetý mańyzdy. Ásirese tehnıkasy ábden eskirgen jetisýlyq sharýalardyń qarjylyq resýrstar men jańa tehnologııalarǵa qol jetkizýi – ózekti másele. Osy oraıda oblys ortalyǵyna Májilis depýtaty Jıgýlı Daırabaev, Qazaqstan Fermerler qaýymdastyǵy basqarma tóraǵasynyń birinshi orynbasary Ermek Abýov, Aýyl sharýashylyǵy mınıstrliginiń ókili Asqar Sanaýbarov kelip, jetisýlyq sharýalardyń kókeıkesti talap-tilekterin tyńdady.
Qazaqstan Fermerler qaýymdastyǵy oblystyq fılıalynyń basqarma tóraǵasy Asqar Sháripovtiń aıtýynsha, byltyr qaýymdastyq eksperttik tujyrymdaýlarǵa qatysyp, memlekettik birneshe jobaǵa saraptama bergen. Uıymdastyrylǵan arnaıy konferensııada ózekti taqyrypqa aınalǵan júgeri máselesine de den qoıyldy. Máselen, byltyr oblysta dándik júgeri egilgen alqaptyń ár gektary 69 sentnerden aınalyp, jalpy túsim 393,5 myń tonnany quraǵan. Desek te ishki jáne syrtqy naryqta dándik júgeri baǵasynyń kúrt tómendeýine baılanysty syrtqy suranys toqtap qaldy. Sóıtip, júgeri satý úlken problemaǵa aınaldy. Sondaı-aq sý máselesi de ózekti. О́ńirde sý únemdeý maqsatynda jańbyrlatyp, tamshylatyp sýarý ádisin qoldanatyn alqaptardy 2 ese ulǵaıtý josparlanyp otyr.
Jıynda bıyldan bastap jańadan ashylǵan «Biryńǵaı keshendi baǵdarlama» aıasynda kóktemgi dala jumystaryna nesıe, sýbsıdııa, kepildik alý úshin «Damý» qory arqyly ótinim berýge bolatyny aıtyldy. Buǵan qosa, agroónerkásip keshendi damytýda eńbektenip jatqan sharýashylyq ıelerin qarjylandyrýda atqarylǵan jumystar men «Isker», «Keń dala» baǵdarlamalary boıynsha nesıe alý joldary baıandaldy.
Veterınarııa salasyndaǵy túıtkilder de qozǵaldy. Sala mamandarynyń aıtýynsha, josparǵa sáıkes búginde qajetti vaksınanyń jartysy jetkizilip, maldan qan alý jumystary bastalǵan. Qyzmetkerden de tapshylyq joq.
«Bul basqosý aýyl sharýashylyǵy salasyna qozǵaý salady. Sebebi azyq-túlik qaýipsizdigi – memleketimiz úshin basty másele. Aýyl sharýashylyǵyn damytý, azyq-túlik qaýipsizdigin qamtamasyz etý, túıtkildi problemalardyń túıinin tarqatý, memleket tarapynan sharýalarǵa qoldaý kórsetý sııaqty máseleler tóńireginde oıymyzdy ortaǵa salyp, pikir almastyq. Jıyn arqyly aýyl sharýashylyǵy salasynda qandaı problemalar bar, jumys isteýge ne kedergi, fermerlerdi nendeı máseleler alańdatady, aýyldy qalaı damytamyz degen suraqtar týraly tereńnen áńgime qozǵaldy. Endi sharýalar kótergen usynys-tilekter basshylyqqa alynyp, sonyń tóńireginde jumystar atqarylady. Aýyl sharýashylyǵy órkendese, el kósegesi kógeredi. Sondyqtan jumys isteımin degen adamǵa barynsha jaǵdaı týǵyzyp, múmkindik berý kerek. Qalaı desek te árbir azamat baqýatty, áleýeti órkendegen mádenıetti elde ómir súrýge quqyly. Osyǵan jetý baǵytynda biz áreket etetin bolamyz», dedi J.Daırabaev.
Jetisý oblysy
