Foto: Aqorda.kz
«Halqymyz óte aýyr synaqqa tap boldy. Qazaqstan aýmaǵynyń jartysyn tasqyn sý basyp qaldy. Elimizdiń myzǵymas birligi osy qıyn kúnderde aıqyn kórindi. Qutqarýshylar, volonterler, memlekettik qyzmetshiler, sarbazdar, tártip saqshylary, qoǵam belsendileri, bıznes ókilderi jáne jastar – bári birge júr. Ortaq isten eshkim shet qalǵan joq. Búkil aımaqta qoǵamnyń barlyq ókilderi bir kisideı jumyldy.
Otandastarymyz zardap shekken jandarǵa jappaı qol ushyn sozdy. Bir-birine shynaıy janashyr boldy. Men qarǵyn sýmen kúresýge zor úles qosqan naǵyz otanshyl azamattarǵa sheksiz rızamyn.
Biz syn saǵatta jurt bolyp jumyldyq. Úkimet, memlekettik organdar, quzyrly mekemeler jáne eriktiler birlese jumys istedi. Sonyń arqasynda 119 myńnan astam adam der kezinde qaýipsiz jerge kóshirildi. Onyń 45 myńǵa jýyǵy – balalar. Eń bastysy, biz adam ómirin barynsha saqtap qaldyq», dedi Qasym-Jomart Toqaev.
Sondaı-aq Prezıdent óz sózinde sý tasqyny bolǵan aımaqta qol ushyn sozyp júrgen barsha azamattarǵa alǵys aıtyp, memlekettik materıaldyq rezervti paıdalanýǵa tapsyrma bergenin aıtty.
«Kezinde bir ǵana bógenniń buzylýy úlken qaıǵyly oqıǵaǵa ákep soqtyrǵanyn bilesizder.
Men jaǵdaıdy baqylaýda ustaý úshin birqatar aımaqta boldym. Turǵyndarmen arnaıy kezdestim. Ortalyq jáne jergilikti memlekettik organdar apat saldaryn joıýǵa bar kúshin jumsap jatyr. Jaǵdaıdyń odan ári ýshyǵyp ketpeýi – basty nazarda. Qutqarýshylar kúndiz-túni jumys istep júr. Ulttyq ulan, Ishki ister mınıstrligi, Qarýly Kúshter, Ulttyq qaýipsizdik komıteti, Memlekettik kúzet qyzmetiniń jeke quramy da belsene atsalysyp jatyr.
Meniń tapsyrmammen memlekettik materıaldyq rezervti paıdalanýǵa ruqsat berildi. Respýblıkalyq jáne oblystyq jedel shtabtar jumys istep jatyr. Qoǵam belsendileri jáne volonterler gýmanıtarlyq kómek jınaýdy qolǵa aldy.
Halqymyzdyń yntymaǵy men joǵary azamattyq jaýapkershiligi osy kezde aıqyn kórindi. Birqatar aımaqtar ınfraqurylymdy jáne búlingen úılerdi qalpyna keltirýge kirisip ketti. Bul sharýaǵa iri bıznes ókilderi qosyldy. Qoǵam belsendileri de zor úles qosýda. Elimizdegi kompanııalar, jeke kásipkerler túrli kómek qorlaryna qomaqty qarjy aýdardy. Qarajat kún saıyn túsip jatyr, kómek qory ulǵaıady dep senemin. Kásipkerlerge zor alǵys aıtamyn. Bolashaqta da halqymyzdyń ıgiligi úshin birge jumys isteımiz dep senemin», dedi Prezıdent.
