Foto: Aqorda baspasóz qyzmeti
Memleket basshysynyń aıtýynsha, qazaqta «Alpys kún tasyǵan darııa, alty kúnde qaıtady» degen sóz bar. Kóp uzamaı qarǵyn sý ketip, jurt kúndelikti ómirge oralady. Halymyz aıtqandaı «Ár qıyndyqtyń qaıyry bar».
«Birinshiden, tasqyn kezinde el birligi nyǵaıa tústi. Arqadaǵy aǵaıynǵa, Jaıyqtaǵy jurtqa búkil Qazaqstan halqy kómektesýge umtyldy. Apat aımaǵynda turatyn adamdar barsha otandasymyzdyń shynaıy janashyrlyǵyn sezindi. Ekinshiden, eldiń jaǵdaıyn jaqsartý úshin eshkim qıyndyqtyń kelýin kútip otyrmaıtyny anyq. Degenmen, mundaı apattar biraz sharýany shuǵyl qolǵa alýǵa sebepker bolady», dedi Prezıdent.
Prezıdenttiń aıtýynsha, tasqyn aıaqtalǵan soń keıbir aýyldar tyń jerge qonystanyp, jańadan boı kóteredi. Jol salynady, sý tartylady. Aýyldarymyz múlde jańa kelbetke ıe bolady. «Jalpy, álemdegi úlken daǵdarystardyń qarqyndy damýǵa jol ashatyny belgili», dedi ol.
«Qazirgi alapat tasqyn da, túptep kelgende, elimizge oń áserin tıgizedi dep oılaımyn», degen Prezıdent syn saǵatta judyryqtaı jumylǵan jurtymyz osy qalpynda órleý, jańǵyrý kezeńine qadam basqanyn, bári de jaqsy bolatynyn aıtty.
«Bárimiz – bir eldiń azamatymyz. Tarıh toǵystyrǵan taǵdyrymyz – bir, senimmen qadam basatyn keleshegimiz – bir. Biz birtutas ult retinde árdaıym babalar amanatyna adal bolamyz. Qasıetti qara shańyraǵymyz – Qazaqstannyń jarqyn bolashaǵyn birge jasaımyz. Bizdiń maqsatymyz – aıqyn, bul – Ádiletti Qazaqstandy qurý. Men Qazaqstan Respýblıkasynyń Táýelsizdigin qorǵaýdy Prezıdent retindegi eń basty mindetim dep sanaımyn. Osy qasterli mindet Ádiletti Qazaqstandy qurý jáne belsendi ári syndarly syrtqy saıasat júrgizý arqyly ǵana oryndalady. Bıik maqsatqa jetý úshin túrli kedergiden ótemiz, barlyq qıyndyqty jeńemiz. Aýqymdy mindetterdi oryndaımyz. Biz elimizdiń basty qundylyqtary men baǵyt-baǵdarynan aınymaımyz. Azamattardyń amandyǵyn qamtamasyz etý – eń basty maqsat. Memlekettiligimizdi nyǵaıtyp, táýelsizdik týyn árdaıym bıik ustaımyz. Men buǵan nyq senemin jáne sol úshin bárin jasaımyn. Bul – meniń prezıdenttik ári perzenttik paryzym. Elimiz aman, jurtymyz tynysh bolsyn!», dedi Memleket basshysy.
