Foto: baq.kz
«Mıgranttar týraly júıeli áleýmettik zertteýler júrgizý qajet. Mıgrasııa – adamdardyń beı-bereket qozǵalysynyń mehanıkalyq prosesi ǵana emes. Ol, eń aldymen, beıimdelý úrdisi, áleýmettik jaǵdaı men ómir saltynyń ózgerýi. Sondyqtan eńbek mıgranttary men qonys aýdarýshylarǵa aqparattyq, zańnamalyq, tildik, mádenı qyzmet kórsetetin arnaıy beıimdeý ortalyqtary bolýy kerek», dep atap ótti senator.
Zańsyz eńbek mıgranttary máselesine de nazar aýdarǵan senator qandastardy kóshirý jáne olar úshin kvotalardy ulǵaıtý máselesin de qozǵady. Depýtat Eńbek jáne áleýmettik qorǵaý mınıstrligi ázirlegen «Ata joly» kartasyn qandastar mártebesimen teńestirý qajet dep sanaıdy.
«Eńbek jáne áleýmettik qorǵaý mınıstrligi ázirlegen «Ata joly» kartasynyń múmkindikteri zańdy túrde bekitilýi tıis. Bul karta etnıkalyq qazaqtarǵa beriletin qandas mártebesimen teńestirilýi kerek. Qandastarǵa beriletin kvotany da kóbeıtý qajet. Máselen Aqmola oblysyna bólingen 285 kvota qańtar aıynda, Rýdnyıǵa bólingen 200 kvota aqpan aıynda ıgerilip qoıǵan. Qazaqstanǵa kelgenderdiń basym bóligi Mańǵystaý óńirine turaqtaǵanyn eskersek, soltústikke qonys aýdarý baǵdarlamasyna ońtústikpen birge batys aımaqtardy da qosqan abzal dep oılaımyz. Sonymen qatar soltústik óńir ákimdikteri halyq kóbirek kóshetin aýdandarda front-ofıs túrinde ókildikter ashyp, túsindirý jumystaryn arttyrǵany jón», dedi Darhan Qydyráli.
