– Aınur hanym, áńgimemizdi ózińiz qyzmet etetin analar komıtetiniń jumysy týraly bastasaq.
– «Ana júregi» komıteti – sarbazdarǵa anasyndaı qamqorlyq kórsetýdi maqsat tutqan uıym. Komıtet 2019 jyldan beri Qorǵanys mınıstrligi, elimizdegi áskerı bólimdermen tyǵyz qarym-qatynas jasap, balalarymyzdyń áskerdegi jaǵdaıyna qatysty ózekti máselelerdi kóterip keledi. Maqsatymyz – sol máselelerdiń oń sheshilýine atsalysý. Jetistigimiz de joq emes. Sonyń biri de biregeıi dep uıym tóraǵasy Lılııa Haırýllınanyń bastamasymen sarbazdarǵa nesıelik demalystyń berilýin aıtar edim.
– Budan ózge, áskerı bólimderdi aralaý kezinde qandaı máselege basty nazar aýdarasyzdar?
– Qoǵamdyq uıym ókili retinde óz basym sarbazdardyń tamaqtanýy men jatyn ornyna erekshe den qoıamyn. Sondaı-aq teorııalyq jáne tájirıbelik sabaqtar ótetin synyptardy aralaýǵa tyrysamyz. Azyq-túlikti saqtaý tártibin, olardyń jaramdylyq merzimin baqylap, medısınalyq pýnktterge mindetti túrde bas suǵamyz. Medısınalyq personaldyń jumysymen tanysyp, merzimdi qyzmettegi áskerı qyzmetshilerdiń dárigerlik kómekke júginý jýrnalyndaǵy jazbalaryn muqııat qadaǵalaımyz.
Jalpy, analar komıteti ár sarbazdyń taǵdyryna óz balasyndaı alańdaıdy. О́ıtkeni árbir ana balalarynyń áskerı boryshyn qalaı, qandaı jaǵdaıda oryndaıtynyna basa mán beredi. Sondyqtan biz áskerı bólimdermen múmkindiginshe tyǵyz jumys isteýge tyrysamyz. Sarbazdardyń áskerı ómirin, jaǵdaılaryn áleýmettik jeliler arqyly kórsetip otyramyz. Júrgizilip jatqan jumystar aıasynda analar komıteti merzimdi áskerı qyzmetshiler men ata-analar arasynda baılanys ornatyp, áskerı ortadaǵy týyndaǵan máselelerdi ýaqtyly sheshý boıynsha san túrli sharalardy qabyldap keledi.
– Sizdiń óz balańyz da ásker qatarynda ma?
– Iá, ulym Ulttyq ulan sapynda merzimdi áskerı qyzmetin atqaryp júr. Qaraǵandy qalasyndaǵy 6506 áskerı bólimniń qatardaǵy jaýyngeri túzeý mekemesin kúzetedi. Shyny kerek, osy qyzmetke kiriskenimniń sebepkeri de – jalǵyz balam. Keıingi ýaqytta áskerde bolyp jatqan oqys oqıǵalardan janym túrshigip, tynysh jata almadym. Tipti balamdy áskerge jibermeýdiń amaldaryn da qarastyrdym. Alaıda ulym týmysynan tik minezdi edi. Qarsylyǵyma qaramastan: «Anashym, men óz erkimmen áskerge baramyn, ol – meniń azamattyq boryshym» dep talap qoıdy. Balamnyń boıyndaǵy patrıottyq sezimniń ushqynyn kórgenime qýandym. Sodan keıin oıymdy ózgertip, balamdy áskerge jiberdim. Degenmen ana júregi alańdaýly. Sodan bir kúni áleýmettik jeli arqyly «Analar júregi» sarbazdar analary komıteti bar ekenin estip, onyń tóraǵasy Lılııa Haırýllınamen tanystym. Qoǵam belsendisi meni de osy komıtette birge eńbek etýge shaqyryp, Abaı oblysy boıynsha ókili retinde iske kiristim.
– Qoǵamdyq birlestik ókili bolý sizge ne beredi?
– Komıtet tóraǵasy meni qyzmetke almaı turyp, erikti retinde jumys isteıtinimdi táptishtep túsindirdi. Iаǵnı men qoǵamdyq birlestikten bes tıyn da jalaqy almaımyn. Sondyqtan men oǵan tek negizgi qyzmetimnen qolym bosaǵanda ǵana bul jumysqa bilek túre kirisetinimdi jetkizdim. Osylaısha ortaq sheshimge kelgen soń, Abaı óńiri boıynsha sarbazdardyń anasy atandym. Aıyna on bes áskerı bólimge bir emes, birneshe ret baryp qaıtamyn. Qur qol barmaı, tátti taǵamdar men shaǵyn syılyqtar aparamyn. Anamyn ǵoı, sondyqtan árbir sarbazdy óz balamdaı qabyldaımyn.
– Olar da sizdiń kelýińizdi saǵyna kútetin shyǵar?
– Taıaýda Aıagóz qalasyndaǵy áskerı bólimge baryp qaıttym. Sapar barysynda áskerı bólimniń ınfraqurylymyn tekserip, ashanadan bastap, sarbazdardyń jatyn jaıyna deıin tekseris júrgizdim. Budan keıin áskerı bólim basshylyǵyna tek sarbazdardyń qatysýymen ótetin kezdesý uıymdastyryp berýin suradym. Olardy erkin áńgimege shaqyryp, ózekti máselelerin tyńdadym. Odan qalsa kóńilderin kóterý maqsatynda túrli oıyndar uıymdastyrdym. Sarbazdardyń ótinishterin tyńdap, ózimmen birge alyp kelgen tátti taǵamdardy úlestirdim.
Is-sharamyz sońyna jetkende bir sarbaz «Sizdi qushaqtasam bola ma?» deıdi. Surastyryp kórsek, áskerı bólim tabaldyryǵyn endi attap, ant qabyldaýǵa daıyndalyp júrgen sarbaz eken. «Sizdiń sóıleý mánerińiz ben keskin-kelbetińiz anamnan aýmaıdy eken, sizdi qushaqtaýǵa ruqsat etińizshi» deıdi qulaǵyma sybyrlap. Birden Qaraǵandy qalasynda azamattyq boryshyn ótkerip júrgen ulym esime tústi. «Kele ǵoı» dep Aqtaý qalasynan shaqyrtylǵan álgi sarbazdy baýyryma bastym.
Kúnderdiń kúni taǵy da sol áskerı bólimdi baqylap qaıtpaq boldym. Aldymnan kútip alǵan jarqyn júzdi áskerı bólim basshylyǵy «Aıagózdegi ulyńyzdy kórýge keldińiz be?» deıdi qaljyńdap. Men ketken soń álgi sarbazǵa «sarbazdar anasynyń balasy» dep at qoıǵan eken. Ol kezde áli de áskerı tártipke beıimdelmegen jas jigit sońǵy ret barǵanda naǵyz jaýyngerge aınalǵan. Keshegi móldiregen kózderi jasyndaı jarqyrap, bolmysynan qaısarlyqtyń rýhy asqaqtap turǵandaı kórindi.
– Sońǵy ret qaı áskerı bólimge bardyńyz?
– Ulystyń uly kúnine oraı Ulttyq ulannyń Semeı qalasyndaǵy 5511 áskerı bóliminde boldym. Mereıli mereke barysynda «Shyǵys» óńirlik qolbasshylyǵynyń sarbazdaryna ulttyq taǵamdar úlestirip, naýryzkójeden dám tatqyzdym. Sondaı-aq ulttyq oıyndardy jańǵyrtyp, Otan qorǵaýshylar arasynda asyq atý, arqan tartystan saıystar uıymdastyrdyq. Áriptesterim men jaıynda «jalǵyz ulyń bir tóbe, myń sarbazyń bir tóbe» dep qaljyńdap otyrady. Ana mahabbatynan asqan ǵalamat hám tylsym kúsh joq. Onyń peıili darhan, shuǵylasy sheksiz. Sondyqtan aq adal sezimge toly sarbazdar anasynyń júreginde myń sarbazǵa oryn bar.
– Áńgimeńizge rahmet.
Áńgimelesken –
Eskendir ZULQARNAI,
«Egemen Qazaqstan»
