Foto: Global Look Press
Zańnyń maqsaty - 2023 jylǵy 16 maýsymda Sankt-Peterbýrg qalasynda qol qoıylǵan, kelisimge munaı tranzıtiniń kólemi men tarıfterin jańartý máseleleri boıynsha ózgerister men tolyqtyrýlar engizýdi kózdeıtin hattamany ratıfıkasııalaý.
Bul rette Qazaqstan tarapy Kelisimde kórsetilgen baǵyttar boıynsha munaı tasymaldaý qyzmetterine qosylǵan qun salyǵymen nóldik mólsherleme boıynsha salyq salady.
«Atalǵan hattamaǵa sáıkes Reseı munaıyn Qazaqstan Respýblıkasynyń aýmaǵy arqyly Qytaı Halyq Respýblıkasyna tasymaldaý jónindegi Qazaqstan Respýblıkasynyń Úkimeti men Reseı Federasııasynyń Úkimeti arasyndaǵy 2013 jylǵy jasalǵan kelisimniń qoldaný merzimin 2034 jylǵa deıin uzartý jáne munaı tranzıtiniń kólemin, tarıfti ózektendirý máselelerine qatysty kelisimge ózgerister engizý kózdeledi.
2023 jyldyń aqpanynda Reseı tarapy (Rosneft) 10 jyldyq kezeńge 100 mln tonna jetkizý týraly Qytaı tarapymen (SPNS) kelisimin uzartyp, qol qoıdy. Osyǵan baılanysty, 2023 jyldyń maýsymynda Sankt-Peterbýrg qalasynda Qazaqstan Respýblıkasy men Reseı Federasııasy ekijaqty kelisimge ózgerister engizý týraly hattamaǵa qol qoıyldy. Hattamada munaı tranzıtiniń kólemin jáne tarıfti ózektendirý máselelerine qatysty kelisimge ózgerister engizý kózdeledi», dedi Súıindik Aldashev.
Senattyń turaqty komıssııalarynda zańǵa qatysty eskertýler men usynystar bolmaǵandyqtan, qujat maquldandy.
Qyrmyzy JUMAǴALIQYZY,
EUÝ stýdenti
