Foto: Aqorda baspasóz qyzmeti
Qasym-Jomart Toqaevqa ótken jyly AHQO-da tirkelgen kompanııalardyń sany 670-ten (jalpy álemniń 78 elinen 2600-den asa kompanııa) asqany jóninde málimet berildi. Bul – rekordtyq kórsetkish.
Byltyr jáne osy jyldyń alǵashqy úsh aıynda Ortalyq qatysýshylary memleket bıýdjetine 48,7 mıllıard teńge salyq tólegen. Daýlardy sheshýde AHQO soty men Halyqaralyq arbıtraj ortalyǵy sııaqty ınstıtýttar tabysty jumys istep jatyr. 2023 jyly 767 kommersııalyq is qaralǵan.
Prezıdent Qarjy ortalyǵyn odan ári damytýǵa qatysty birqatar ózekti mindetti aıqyndap berdi. Atap aıtqanda, AHQO-nyń óńir úshin jasyl qor tartý jáne Orta dálizdi damytý isindegi róline toqtaldy. Elimizdegi «jasyl» oblıgasııalar men kredıtterdiń 60 paıyzdan astamy AHQO Jasyl qarjy ortalyǵynyń qoldaýymen berildi. Qarjy ortalyǵynyń ıýrısdıksııasynda Orta dáliz jobasy aıasynda birlesken kásiporyndar jumys istep jatyr.
Sonymen qatar Qasym-Jomart Toqaev qazirgi jaǵdaıda mámileler jasaý úshin AHQO ınfraqurylymyn belsendi paıdalana otyryp, Qazaqstan ekonomıkasyna ınvestısııa tartýǵa kómektesetin barlyq memlekettik organ men oǵan jetekshilik etetin qarjy ınstıtýttarynyń kúsh-jigerin biriktirý qajet ekenine nazar aýdardy.
