Ulttyq statıstıka bıýrosynyń málimetine qaraǵanda, ótken jyldyń sońynda elimizdegi jastardyń 7,1 paıyzy, nemese 379,3 myń qyz ben jigit NEET sanatyna jatqyzylǵan. Memleket basshysynyń tapsyrmasyna sáıkes 2029 jylǵa qaraı NEET sanatyndaǵy jastar úlesin 3,5 paıyzǵa deıin, ıaǵnı eki ese azaıtý kózdelip otyr.
Osy mindetti oryndaý maqsatynda Astana qalasynyń ákimdigi byltyr 2023-2026 jyldarǵa arnalǵan «Joltap» áleýmettik jobasyn ázirlep, qanatqaqty rejimde iske asyra bastady. Sol úshin ótken jylǵy 26 mamyrda «Jańa múmkindik» qoǵamdyq qory qurylyp, oǵan elordanyń saýda, qurylys, qoǵamdyq tamaqtandyrý, kólik jáne basqa qyzmet kórsetý salalaryndaǵy kóshbasshy kásiporyndar qarjy aýdaryp, demeýshilik jasady.
Atalǵan qor qyzmetkerleri megapolıste jumyssyz júrgen jáne aýyldy jerlerden kóship kelgen jastardy anyqtap, olardy praktıkalyq daǵdylarǵa oqytyp, jumysqa ornalastyrýǵa jáne shaǵyn bıznes ashýlaryna kómektesedi. Bul rette demeýshilik kórsetken seriktes kásiporyndar jumysshy mamandyqtary boıynsha óz talaptary men standarttary eskerilgen qysqa merzimdi oqytý baǵdarlamalaryn ázirleýge múddelilikpen atsalysqan.
Sýretti túsirgen – Erlan OMAR, «EQ»
Búginde elordanyń adamdar kóp jınalatyn oryndary – «Azııa Park» saýda-oıyn saýyq ortalyǵynda, «Aıland» otbasylyq demalys ortalyǵynda, «Tulpar», «Vstrecha», «Mechta», «Euromall», «Rahmet 1», «Rahmet 2» saýda úılerinde, «Januıa» otbasylardy qoldaý ortalyǵynda, «Jastar» saraıynda jáne Eńbek mobıldiligi ortalyǵynda ornatylǵan 11 «Barshaǵa múmkindik» modýldi beketi kún saıyn saǵat 10.00-den 19.00-ge deıin tegin qyzmet kórsetedi. Olarda 20 konsýltant kestege sáıkes jumys istep júr.
Jumysqa ornalasýǵa jáne kásip úırenýge ótinish bildirgen jastar men ózge de azamattarǵa negizgi úsh baǵyt boıynsha kómek kórsetiledi. Birinshiden, olar elordadaǵy 30-dan astam saýda, qoǵamdyq tamaqtaný, qyzmet kórsetý salalaryndaǵy seriktes kompanııalarǵa tikeleı jumysqa ornalastyrylady. Sonymen birge jumys berýshilerge jumysqa qabyldanýshy jastarǵa tólenetin jalaqyny arttyrý da usynylady. Máselen, Magnum jelisi osyndaı usynysty qabyl alyp, jumyskerler jalaqysyn 115 myń teńgeden 215 myń teńgege deıin kóbeıtken.
Ekinshiden, jańadan ashylǵan biryńǵaı «Jumys tap» telegram-boty arqyly jumysshy mamandyqtar boıynsha bos oryndarǵa jumysqa ornalastyrý júrgiziledi. Onda qalanyń jumys berýshileriniń negizgi servıstik qyzmetteri – saýda, qoǵamdyq tamaqtaný, qurylys, qyzmet kórsetý jáne basqa salalar boıynsha barlyq bos oryndar kórsetilgen. Bul jumys berýshiniń jumys izdeýshimen deldalsyz tikeleı baılanys ornatýyna múmkindik berip otyr. Bıylǵy sáýir aıyna deıin atalǵan telegram-botta 7629 jumys izdeýshi men 601 jumys berýshi tirkelip, 1040 adam bos jumys oryndaryna ornalastyrylǵan.
Úshinshiden, jańa kásip úırengisi kelgen jastar qysqamerzimdi oqý kýrstaryna jiberiledi. Olardyń kásibı daǵdylardy tez meńgerýleri úshin oqý baǵdarlamasynyń 80 paıyzy praktıkalyq is-sharalarǵa arnalǵan. Mundaı oqytý eki baǵdarlama boıynsha uıymdastyrylǵan. Birinshisi – qoǵamdyq tamaqtanýdyń ámbebap qyzmetkeri, tiginshi, modeler-qurastyrýshy, dánekerleýshi, satýshy-kassır, barshy sııaqty jumysshy mamandyqtar boıynsha. Ekinshisi – targetolog, mobılograf, saıt jasaýshy, áleýmettik medıa marketıng menedjeri, grafıkalyq dızaınshy, marketpleıster, beınemontaj jasaýshy sııaqty zamanaýı mamandyqtardy meńgerýge arnalǵan «Freelance múmkindik» sıfrlyq daǵdylar baǵdarlamasy. Atalǵan oqytý baǵdarlamalarymen 1769 adam qamtylǵan.
«Joltap» áleýmettik jobasy iske qosylǵan byltyrǵy qyrkúıek aıynan beri 8,5 myńnan astam azamatqa tegin qyzmet kórsetilgen, olardyń 56 paıyzy – jumyssyzdar, 33 paıyzy – jaldamaly jumyskerler, 11 paıyzy – ózin ózi jumyspen qamtyǵandar. Jobaǵa qatysqandardyń kópshiligi – turaqty kirisi joq jáne shamadan tys nesıe alǵan adamdar. Osy baǵdarlamanyń kómegimen elordanyń 1,2 myń turǵyny jumysqa ornalasqan. Olardyń 52 paıyzy – 35 jasqa deıingi jastar. Aralarynda aýyldy jerlerden jumys izdep kelgen qyz-jigitter de az emes. Sebebi, jyl saıyn óńirlerden Astanaǵa qonys aýdaryp jatqan 30 myńnan astam adamnyń kópshiligi – mamandyǵy men jumys təjirıbesi joq jastar. Olar, negizinen, megapolıstegi qurylys alańdary men bazarlarda jalaqysy tómen qara jumystarmen aınalysyp, nəpaqa taýyp júr.
Jýyrda Parlament Májilisiniń «Aýyl» partııasynan saılanǵan bir top depýtaty aýyldardan qalalarǵa údere kóship ketip jatqan aýyl jastaryn jumyspen qamtý máselesiniń ózektiligi týraly Úkimetke depýtattyq saýal joldady. Onda byltyr Úkimet otyrysynda oblystardyń əkimdikterine Astana qalasynda qolǵa alynǵan «Joltap» qanatqaqty jobasyn zerdelep, qoldanýǵa tapsyrma berilgenimen, arada jarty jyl ýaqyt ótse de, óńirlerde oǵan jete mán berilmeı, jastar arasyndaǵy jumyssyzdyqty azaıtýdyń tıimdi tásilderi áli qolǵa alynbaı otyrǵandyǵy synǵa alynǵan. Osyǵan oraı, Premer-mınıstr Oljas Bektenov halyq qalaýlylaryna bergen resmı jaýabynda «Joltap» jobasy barlyq óńirde osy jyldyń 1 mamyrynan bastap iske asyryla bastaıtyndyǵyn málimdedi.
