Atyraý oblysynyń Tótenshe jaǵdaılar jónindegi jedel shtab málimetinshe tasqyn saldarynan zardap shekken úıler mamandardyń baǵalaýynan ótti.
«5 sáýirde meniń aýlam sý astynda qalyp, úıim qulady. Úıim saman tastan salynǵan bolatyn. Arnaıy komıssııa ony apatty dep tanydy. Búgin múlkimdi baǵalaý nátıjesin aldym, usynylǵan ótemaqy kólemi men úshin jetkilikti. Kómek pen qoldaý úshin memleketke alǵysymdy bildiremin. Osyndaı qıyn sátte jalǵyz qalǵan joqpyz», dedi «4 aýyl» shaǵyn aýdanynyń turǵyny Gúlfaırýz Abırova.
Keıbir turǵyndar óz úılerin jóndeýge kirisip ketken.
«Úıimizge dezınfeksııa júrgizdi. Baǵalaý komıssııasy kelip, tehnıkalyq saraptama jasady. 15 mamyrda maǵan baǵalaý nátıjelerin ákelip tanystyrdy, tanysyp shyqtym. 17 mamyr kúni keshkilik shotyma qarajat tústi. Men úshin ótemaqy kólemi jetkilikti», dedi Aıgúl Ihsanova.
Qazirgi ýaqytta Qulsaryda №20 mektep bazasynda úıleri apatty dep tanylǵan turǵyndarǵa aqparattandyrý, túsindirý jumystary júrgizilip jatyr.
Tasqynnan zardap shekkenderden kúni búginge deıin ótemaqy tóleý tártibi boıynsha barlyǵy 800-den astam adam aqparat aldy. Telefon arqyly 200 turǵynǵa túsinik jumystary júrgizildi.
