Foto: kursiv.media
Otyrys barysynda depýtattar «Qazaqstan Respýblıkasynyń keıbir zańnamalyq aktilerine kredıt berý kezinde táýekelderdi barynsha azaıtý, qaryz alýshylardyń quqyqtaryn qorǵaý, qarjy naryǵyn retteý jáne atqarýshylyq is júrgizýdi jetildirý máseleleri boıynsha ózgerister men tolyqtyrýlar engizý týraly» zańdy eki oqylymda qarady. Zań banktik qaryzdar men mıkrokredıtter berý kezinde kredıtorlarǵa qoıylatyn talaptardy qatańdatý arqyly azamattardyń shamadan tys nesıe alýyn tómendetýdi kózdeıdi.
Atap aıtqanda, zańda azamattarǵa merzimi ótken kredıtteriniń ýaqyty 90 kúnnen asqan jaǵdaıda jáne jubaıynyń nemese zaıybynyń kelisiminsiz nesıe berýge tyıym salý qarastyrylǵan. Odan bólek, qarjy naryǵyndaǵy kıber alaıaqtyqqa qarsy is-qımyl máseleleri de eskerilgen. Endi elektrondy qaryzdar berý kezinde bankter men mıkroqarjy uıymdary klıentti bıometrııalyq sáıkestendirý tártibin júrgizýge mindetteledi.
Talqylaý barysynda senatorlar qujattaǵy normalardy konseptýaldy turǵydan maquldap, oǵan birqatar túzetý engizdi jáne zańdy Májiliske qaıtarý týraly sheshim qabyldady.
Senatorlar usynǵan ózgeristerdiń qatarynda Qazaqstan Respýblıkasy Qarjy naryǵyn retteý jáne damytý agenttiginiń qyzmetin Ulttyq Bank bıýdjetinen qarjylandyrýǵa kóshire otyryp, ony respýblıkalyq bıýdjetten qarjylandyrý quramynan alyp tastaý týraly quqyqtyq tetikter bar. Sondaı-aq merzimdi áskerı qyzmet ótkerý kezeńinde zańda kózdelgen qaryz óteýdi keıinge qaldyrýdy 60 kúnge uzartý usynyldy. Bul túzetý zapasqa shyǵarylǵan áskerı qyzmetshige jumysqa ornalasýǵa jáne tólem qabilettiligin qalpyna keltirýge ýaqyt berý maqsatymen qarastyrylyp otyr.
«Memleket basshysy Qasym-Jomart Kemeluly Toqaevtyń tapsyrmasymen Parlament depýtattary shamadan tys tutynýshylyq nesıe alyp, qaryzǵa batqan azamattar sanyn azaıtýǵa arnalǵan júıeli zańnamalyq túzetýler toptamasyn ázirledi. Zań arqyly azamattardyń bank nesıeleri men mıkrokredıtter boıynsha qaryzdaryn kollektorlarǵa satýǵa eki jyldyq, ıaǵnı 2026 jylǵy 1 mamyrǵa deıin moratorıı engizý usynylyp otyr. Sotqa deıingi retteý jáne atqarýshylyq is júrgizý sheńberinde azamattardyń quqyqtaryn qorǵaý tetikteri kúsheıtiledi. Bank ombýdsmanynyń ókilettikteri keńeıtiledi. Sondaı-aq, jańa mıkroqarjy ombýdsmany ınstıtýty engiziledi. Búgin senatorlar engizgen ózgerister zańnyń jekelegen erejelerin jetildirýdi kózdeıdi. Osy zańda kózdelgen sharalar azamattarymyzdyń quqyqtaryn tıimdi qorǵaýǵa jáne qarjylyq saýattylyqty arttyrýǵa oń áserin tıgizedi dep senemiz», dedi Máýlen Áshimbaev.
