Fotolar: M.Tajkýranov.
«О́zderińizge málim, «Uly dala joryǵy» marafon-báıgecin Memleket basshysy nazarynda ustap, únemi qoldaý kórsetip keledi. Kúni keshe «AMANAT» partııasy fraksııasy depýtattary kótergen qazaq jylqylary tuqymyn saqtaý jáne molaıtý týraly zań jobasy birinshi oqylymda maquldandy. Osy arqyly memleket asyl tuqymdy jylqylarymyzdy qorǵaý úshin bar jaǵdaıdy jasaıtyn bolady», dedi «AMANAT» partııasynyń Atqarýshy hatshysy Dáýlet Káribek.
Bes kúnge sozylǵan jarystyń qorytyndysy boıynsha máre syzyǵyn birinshi bolyp Jetisý oblysy komandasy kesip ótti, jalpy ýaqyty 32 saǵat 40 mınýt 18 sekýndty qurady. Ekinshi oryn Mańǵystaý oblysy shabandozdaryna (33 saǵat 05 mın. 30 sek.), úshinshi oryn Almaty qalasy komandasyna (33 saǵat 31 mın. 08 sek.) buıyrdy. Tórtinshi oryndy Jambyl oblysy quramasy (34 saǵat 22 mın. 03 sek.), besinshi oryndy Astana qalasynyń komandasy (37 saǵat 10 mın. 32 sek) ıelendi.
Úshinshi maýsymda 500 shaqyrymdy eńserip úzdik atanǵan shabandozdar: Jetisý oblysynan Máýlethan Eraly (32 saǵat 24 mın. 42 sek), Qostanaı oblysynan Muhambetov Álıhan (32 saǵat 32 mın. 08 sek), sondaı-aq Shyǵys Qazaqstan oblysynyń eki shabandozy – Ábish Etrekov (34 saǵat 01 mın. 37 sek) jáne Dýlat Jumashov (34 saǵat 53 mın. 37 sek).
Bıyl Pavlodar – Astana baǵytyndaǵy marafon-báıgege barlyǵy 19 komanda qatysqanymen, olardyń 11-i ǵana jarys qashyqtyǵyn tolyq júrip ótti.
«Búginde «Uly dala joryǵy» marafon-báıgesi dúbirli doda ǵana emes, sonymen qatar kóshpendiler mádenıetin ilgeriletýdiń biregeı jobasyna aınaldy. Qyrkúıek aıynda shabandozdarymyzdy jańa jarys kútip tur. Olar V Dúnıejúzilik kóshpendiler oıyndary qarsańynda halyqaralyq marafonǵa qatysady. Bul – búkil álemge shabandozdarymyzdyń eptiligi men sheberligin, sondaı-aq qazaq jylqylarynyń tózimdiligin kórsetýdiń tamasha múmkindigi», dedi Ulttyq sport qaýymdastyǵynyń prezıdenti Islambek Saljanov.
Alǵashqy úsh júldeger komanda 2-7 qyrkúıek aralyǵynda ótetin «Uly dala joryǵy» kúzgi halyqaralyq marafonyna lısenzııa alady.
«Uly dala joryǵynyń» bas seriktesi – Ulttyq sport túrleri qaýymdastyǵy. Sondaı-aq jarysqa «AMANAT» partııasy, Pavlodar, Aqmola oblystary ákimdikteri, Týrızm jáne sport mınıstrligi qoldaý kórsetti.
