Aqıqatqa aınalǵan arman

On saýsaǵynan óner tamǵan kásipker kelinshektiń endigi oıy – «Sán úıin» ashý Saltanat eńbektiń qadir-qasıetin jas­taıynan ájesinen úırendi. Aýyl-aımaqqa «oımaqtynyń sheberi» atanǵan jaryqtyq tulymshaǵy jelbiregen on qyzdyń arasynan eki jasynda qulap, múgedektikke ushyraǵan úıdiń úlkeni – ony janynan bir eli tastamaıtyn. Ájesi is tigip jatqan kezde jipsiz baılanyp otyratyn. Birese ıne sabaqtatyp, birese mata kestirip, áıteýir, tynym taptyrmaıtyn. «Oıyn balasy» emes pe, dalada qulyn-taıdaı asyr salyp oınap júrgen baýyrlaryna eleńdep, zyta jónelmekke yńǵaılana bergende taǵy bir jumystyń «qulaǵyn» ustata qoıatyn. Búginde oılap otyrsa, keıýana nemeresiniń densaýlyǵynyń dimkástigine alańdap, ózgege kúnin túsirmeı nápaqasyn adal taýyp jese degen ishki ýaıym jeteginde júrse kerek. Soǵys jyldary tiginshilikti kásip etip, úlken otbasyn asyraǵan qaısarlyǵyna tańǵalatyn. «Syrtqy, ishki kıimder tigip, orys aýyldarynyń turǵyndaryna nanǵa, kartopqa aıyrbastaıtynbyz. Alla taǵala bergen ónerdiń arqasynda shıetteı bes balany qatarynan kem qylmaı ósirip, azamat qataryna qostym. Meniń jolymdy sen jalǵastyrsań, armanym bolmas edi», degen sóz músirkegendikten emes, úlken senim artqandyqtan aıtylatyn edi. Saltanat qaıda júrse de, áje amanatyn esten bir shyǵarǵan emes. Taýdaı talap júgin arqalap, oblys ortalyǵyndaǵy № 42 tehnıkalyq ýchılıshege oqýǵa tústi. Ony bitirgennen keıin Jambyl aýdanyna qarasty Ozernyı aýylyndaǵy turmystyq kombınatqa jumysqa ornalasty. Alǵashqy eńbek jolyn tiginshilikten bastap, keıin meńgerýshilikke joǵarylatyldy. Taǵdyrdyń jazýymen Qostanaıdyń pedagogıka ınstıtýtyn támamdap kelgen jas maman Seıdilmálik degen jigitpen kezdesip, turmys qurdy. Tuńǵyshy Adaı dúnıege kelgende shóbere súısem degen tilegine jete almaǵan ájesiniń «Qaıda júrseń de aman bol, qulynym!» degen ájim torlaǵan jyly júzi kóz aldyna eles­tep, kóńili bosap sala bergen. Ekinshi uly Ádilbektiń ińgálaǵan úni shańyraq shattyǵyn toltyrdy. Búginde Saltanat Áskerqyzynyń tiginshilikpen aınalysqanyna 34 jyl bolypty. Onyń qolynan shyqqan kez kelgen buıymnyń túr úılesimdiligi, sán úlgisi, tigisteri men oıyqtarynyń ásem qıystyrylǵandyǵy sonshalyq, kózdiń jaý­yn birden alady. Áńgime barysynda ol kásibı sheberlik úırenýmen, izdenýmen qalyptasatynyn aıta kelip, tiginshilikti kásip etip, otbasylyq násipke aınaldyrǵanyna ókinbeıtinin jetkizdi. Kez kelgen kıimdi boıǵa qonymdy etip, sheberlikpen tigý úırenshikti ádetine aınalǵany birden baıqalady. Osy kezge deıin «Zınger» eski tigin mashınkasymen jumys istep kelse, endi sońǵy úlgidegi shveısarııalyq qural satyp alǵanyna sheksiz qýanýly. Bul oraıda, «Damý» kásipkerlikti damytý qory men «Kazkommersbanktyń» «Qus joly» korporatıvtik qorynyń birlesip, múmkindigi shekteýli jandarǵa arnalǵan «Juldyzdarǵa qara!» jobasyna qatysyp, qaıyrymdylyq grantyn jeńip alǵan. Sonyń arqasynda kásibin odan ári jandandyryp, jeke kásipkerligin zańdy túrde resimdeý múmkindigine ıe bolǵan. – Eń bastysy, zamanaýı tigin mashınkasyna baǵdarlamany durys engize bilý kerek. Bastap­qy­da meńgerý qıynǵa soqty. Tehnı­kanyń tiline jetik ulym­nyń arqasynda barlyq baǵdar­lamalardy tez-aq úırenip aldym. Tutynýshylardyń kez kelgen talǵamyn oryndaý múmkindigi de ulǵaıdy. Keıbireýler ınternetten kórip unatqan kıim úlgisiniń kóshirmesin ákelip, qolqa salyp jatady. Olardyń ótinishterin eki etken emespin,– deıdi Saltanat. Tiginshilikpen júıeli shu­ǵyl­danýdyń arqasynda otbasynyń tabysy molaıa túsken. Nesıe arqyly úı alǵan. Onyń aıtýynsha, ánshiler men bıshilerden tapsyrys jıi túsetin kórinedi. Balalar kıimi, qudalyq, qyz uzatý, kelin túsirý jasaý-jabdyqtaryna, oıýly kórpe-jastyqtarǵa usynystar kóp. Qabyldaǵan tapsyrystardy der kezinde ári sapaly etip oryndaý – onyń mindeti. Eshqandaı shaǵymdardyń aıtylmaýyna qaraǵanda, jurtshylyq kóńilinen shyqqan tárizdi. Jazda kúni boıy baý-baqshada bolatyndyqtan, keshkilik bastalǵan jumystyń túnniń bir ýaǵyna deıin sozylyp ketetin kezderi jıi kezdesedi. Al qysta naǵyz taptyrmaıtyn ermek. Sheberdi qýantatyn bir jaı, tigin­shilikke qajetti zat­tar­dyń dúken sórelerinde tolyp turǵandyǵy. Qolóner de shyǵarmashylyq izdenisten týyndaıtyny anyq. Sondyqtan Saltanat árkez qııal men arman qushaǵynda júrip, bir-birine uqsamaıtyn jaýhar týyndylardy tutynýshylarǵa usynýǵa beıil. Áje amanatynyń, bala armanynyń aqıqatqa aınalyp, eńbektiń rızyǵyn tatyp otyrǵan baqytty kúnge jetkenine shúkirshilik etedi. – Jubaıym kolledjde ustaz­dyq etedi. Úlken ulym jumys is­teıdi. Kishi ulym bıyl áskerı ınstıtýtty bitiredi. Eńbektiń dá­min tatqan biler degen. Aldaǵy maqsatymyzdyń biri – páterdi keńeıtip, áke-sheshemizben birge turý. Jastaý kezimde «Sán úıin» ashýdy armandaýshy edim. Ol kúnge de jetermin. Eń bastysy, elimizdiń tynyshtyǵyn tileıik, basymyz aman, baýyrymyz bútin bolsyn!–dedi qoshtasar sátte óz isiniń maıtalmany S. Qaraǵojına. Gúlgúl TО́LEShOVA, jýrnalıst. Soltústik Qazaqstan oblysy.