Patrıottyq mıssııa mejege jetti

Astana tórinen alǵashqy saparyn bastap, elimizdiń barlyq aımaǵynda ornalasqan áskerı bólimderdi aralap shyqqan «Jeńiske qurmet» marafondyq aksııasynyń mártebeli jalaýy Almaty qalasyna jetkizilgen edi. Uly Jeńistiń 70 jyldyǵy men Dostastyq elderindegi Ardagerler jylyna oraı Memleket basshysy, Qazaqstan Qarýly Kúshteriniń Joǵarǵy Bas qolbasshysy Nur­sultan Nazarbaevtyń bastamasymen ótken jylǵy jeltoqsan aıynyń sońǵy kúninde Astana tórinen shyqqan patrıottyq marafon Astana, Qaraǵandy, Semeı, Taraz, Aqtaý sekildi iri qalalarda bolyp, urpaqtar jalǵastyǵy men Uly Jeńis jolynda janyn qıǵan qaharman erlerge degen qurmettiń belgisi retinde óziniń beıbit mıssııasyn Jetisý jerinde aıaqtady. 28 panfılovshylar saıabaǵynda ornalasqan Máńgilik alaý memo­rıaldyq kesheni aldyna jıylǵan Uly Otan soǵysy men Aýǵan soǵy­synyń ardagerleri, túrli qoǵam­dyq uıym ókilderi men qala turǵyn­dary aldynda Qazaqstan Respýb­lıkasy Qarýly Kúshteri Aero­utqyr áskeri bóliminiń basshysy, general-maıor Dáýlet Ospa­nov sóz sóılep, Uly Otan soǵy­synyń ardagerlerine jasaǵan erlik­teri men el qorǵaý isindegi adal­dyǵy úshin, bolashaq urpaqtyń tynysh­tyǵy men turaqty ómir syılaýǵa qosqan úlesteri úshin alǵys aıtyp, olarǵa syı-sııapat jasady. «Nur Otan» partııasy Almaty qalalyq fılıaly tóraǵasynyń birinshi orynbasary Kenjehan Ma­ty­janov qala ardagerleriniń qoǵam­dyq jumystar men jas urpaq­ty áskerı-patrıottyq rýhta tár­bıeleý isine de atsalysyp otyrǵan eńbekterin tilge tıek etip, Otanǵa degen adaldyǵy men qaltqysyz qyzmetine rızashylyǵyn bildirdi. – Jeńis jolynda janyn da, qanyn da aıamaǵan ata-apa­lary­myzdyń erlik isteri búgingi urpaq – bizder úshin úlken qurmetke laıyq kıeli is. Jas urpaq olardyń ónegesinen Otandy súıý, elge adal qyzmet etý sekildi kóptegen qasıetti úlgi etip alady. Ata-apalarymyzdyń jasaǵan erlik isteri men qol jetkizgen jeńisi búgingi tynysh ómir men órkendegen Qazaqstannyń turaqtylyǵyna negiz qalady. Berekeli ómir súrip otyrǵan merekeli eldiń perzentteri atynan sizderge alǵysymyzdy jetkizemiz, – dedi K.Matyjanov saltanatty sharada sóılegen sózinde. О́z kezeginde soǵys ardagerleri Qazaqstan Qarýly Kúshteriniń sarbazdaryna batalaryn berip, elimizdiń tynyshtyǵy men turaqtylyǵy, Otanymyzdyń shekarasy men tutastyǵyn saqtaýda aıanbaı eńbek etýlerin amanattap, Elbasy Nursultan Nazarbaevtyń ardagerler men qarııalarǵa jasap otyrǵan qamqorlyǵyna rızashylyǵyn bildirdi. Saltanatty shara barysynda Dańq memorıaly aldyndaǵy Máńgilik alaýǵa gúl shoqtary qoıylyp, patrıottyq marafonnyń mártebeli belgisi – Áskerı jalaý­dy saltanatty kúzet áskerleri Qazaqstan Respýblıkasy Qorǵanys mınıstrliginiń ókiline tabystady. Atalmysh jalaý Astana qalasynda ornalasqan Saǵadat Nurmaǵambetov atyndaǵy «Jas ulan» respýblıkalyq áskerı mektebine saqtaýǵa berilip, aldaǵy ýaqytta ardagerlerge kórsetiler joǵary qurmettiń belgisi retinde qasterli tuǵyrǵa qoıylatyn bolady. Qanat ESKENDIR, «Egemen Qazaqstan». ALMATY. Sýretti túsirgen  Iýrıı BEKKER.