Qazaq dárigeri «Medısına marshaly» atandy

Densaýlyq saqtaý salasyndaǵy jetistikteri úshin Ulttyq ǵylymı medısınalyq ortalyǵyna Fransııanyń bedeldi nagradasy – Napoleon ordeni berilse, al onyń dırektory Abaı Baıgenjın «Medısına marshaly» ataǵyna laıyqty dep tanyldy. Densaýlyq saqtaý jáne áleýmettik damý mınıstrliginiń baspasóz qyzmeti atap kór­set­kendeı, atalmysh orden – ekonomıka, bilim jáne medısına salalarynda erekshe eń­begi­men kózge túsken ujymdar men jekelegen tulǵalarǵa beriletin, 1801 jyly Napoleon Bonaparttyń dekreti boıynsha taǵaıyndalǵan marapat ataýy. Ol  1886 jyly Gýstav Eı­felge (ózi attas munara qurylysy úshin), 1833 jyly Ben Fýrneıroǵa (gıdravlıkalyq týrbınany oılap tapqany úshin), 1873 jyly Lýı Pasterge (óziniń esimin ıelengen fermentızasııa úrdisin oılap tapqany úshin) tabys etilgen. Budan bólek, oǵan ıe bolǵandardyń qatarynda «Mıshlen», «Pejo», «Dasso», «Matra», «Reno» syndy álemge áıgili,  ulttyq jáne halyqaralyq deńgeıde irgeli jetistikterge jetken kompanııalardyń basshylary bar. «Ulttyq ǵylymı medısınalyq ortalyǵy» AQ-tyń (UǴMO) bas dırektory A.Baıgenjın: «Ǵylym salasyndaǵy kórnekti jetistikter úshin 2012 jyly bizdiń ortalyqqa Napoleon esimimen atalatyn altyn medal berilgen-di. Mine, Fransııa memleketi taǵy da eńbegimizdi elep, Napoleon ordenin usynyp otyr. Mundaı syılyqtardy buǵan deıin Shveısarııa men Ulybrıtanııadan alǵan edik. Bul – ǵylymy damyǵan elderdiń bizdi baǵalaǵany, dáliregi, Qazaqstannyń medısına salasyndaǵy jalpy jetistigin  moıyndaýy», – deıdi. Tanystyra keteıik, «Medısına marshaly» atanǵan Abaı Baıgenjın – búkil sanaly ǵumyryn densaýlyq saqtaý salasyna arnaǵan belgili azamat. Ol 1970 jyly Almaty memlekettik medısınalyq ınstıtýtyn «emdeý isi» mamandyǵy boıynsha bitirgennen keıin, densaýlyq saqtaý júıesinde túrli qyzmetter atqarǵan. Atap aıtsaq, A. Baıgenjın ár jyldarda Almaty qalalyq jedel medısınalyq kómek klınıkalyq aýrýhanasy bas dárigeriniń orynbasary, «Alataý» sanatorııiniń bas dárigeri, Almaty aımaqtyq dıagnostıkalyq ortalyqtyń dırektory, Memlekettik aeroǵarysh kompanııasynyń vıse-prezıdenti, Qazaqstan Respýblıkasy Úkimeti janyndaǵy mindetti medısınalyq saqtandyrý qory bas dırektorynyń orynbasary, Astana qalasyndaǵy respýblıkalyq klınıkalyq aýrýhananyń dırektory syndy jaýapty qyzmetterdi abyroımen atqardy. 2004 jyldan bastap qazirgi ýaqytqa deıin «Ulttyq ǵylymı medısınalyq ortalyǵy» AQ-tyń (UǴMO) bas dırektory. Sondaı-aq, ol medısına ǵylymdarynyń doktory, professor, «Parasat» ordeniniń ıegeri. Joldybaı BAZAR, «Egemen Qazaqstan».