Foto:gov.kz
BJZQ-nyń mindetti zeınetaqy jarnalary (MZJ), mindetti kásiptik zeınetaqy jarnalary (MKZJ), erikti zeınetaqy jarnalary (EZJ) esebinen qalyptastyrylǵan zeınetaqy aktıvterinen túsip, salymshylardyń (alýshylardyń) shottaryna bólingen kiristilik 2024 jyldyń 4 aıynda 2,87% kórsetti. 2024 jylǵy 1 mamyrdaǵy jaǵdaı boıynsha jumys berýshiniń mindetti zeınetaqy jarnalary (JMZJ) esebinen qalyptasqan BJZQ zeınetaqy aktıvteriniń kiristiligi - 1,76%.
«2024 jylǵy 1 mamyrdaǵy jaǵdaı boıynsha salymshylardyń (alýshylardyń) shottaryna sońǵy 12 aıda bólingen BJZQ zeınetaqy aktıvteriniń kiristiligi ınflıasııa 8,70% mólsherinde bolǵan kezde 9,83% boldy», delingen habarlamada.
Ulttyq Bank jáne ınvestısııalyq portfeldi basqarýshylar (IPB) zeınetaqy aktıvterin ınvestısııalyq kiris alý maqsatynda ekonomıkanyń Qazaqstandaǵy jáne sheteldegi túrli sektorlarynyń ártúrli qarjy quraldaryna ártúrli valıýtalarda ornalastyrady. Ártaraptandyrý ornyqty ınvestısııalyq kiristilikti qamtamasyz etedi.
«Zeınetaqy jınaqtary - bul uzaq merzimdi ınvestısııalar. Sondyqtan ınvestısııalyq kiristiń mólsherin kem degende bir jylda taldaǵan jón. Máselen, jınaqtaýshy zeınetaqy júıesi
qurylǵan 1998 jyldan bastap 2024 jylǵy 1 mamyrǵa deıingi ınvestısııalyq kiristilik óspeli
qorytyndymen 842,74% kórsetti. Bul kezeńdegi ınflıasııa - 780,79%. Osylaısha, uzaq merzim
ishinde jınaqtalǵan ınvestısııalyq kiris ınflıasııadan asyp tústi», delingen habarlamada.
Eske sala keteıik, elimizde ınflıasııa deńgeıin eskere otyryp, mindetti zeınetaqy jarnalarynyń saqtalýyna biregeı kepildik qarastyrylǵan. Tólemder quqyǵy bastalǵan kezde salymshynyń jınaqtalǵan kiristiligine áser etken jekelegen kezeńde kiristiliktiń tómendeýi kezinde de aıyrmashylyqty óteýge memleket kepildik beredi.
Sondaı-aq BJZQ zeınetaqy aktıvterin ınvestısııalyq basqarý jáne olar ornalastyrylǵan qarjy quraldary týraly aqparat qordyń (www.enpf.kz) resmı saıtyndaǵy «Kórsetkishter/Investısııalyq qyzmet» bóliminde jarııalanady.
Qyrmyzy JUMAǴALIQYZY,
EUÝ stýdenti
