Kollajdy jasaǵan – Almas MANAP, «EQ»
Is-sharaǵa Mádenıet jáne aqparat mınıstrligi Din isteri komıtetiniń tóraǵasy E.Núkejanov, Konfessııaaralyq jáne órkenıetaralyq dıalogti damytý ortalyǵy basqarma tóraǵasynyń mindetin atqarýshy D.Esenova, Islam yntymaqtastyǵy uıymy janyndaǵy ıslam, óner jáne mádenıet tarıhyn zertteý ortalyǵynyń (IRCICA) bas dırektory Mahmýd Erol Kylych, halyqaralyq uıymdardyń, Úndistan, Túrkııa, Mysyr, Pákistan, Ulybrıtanııa, Reseı, Izraıl, Vatıkan elderiniń ǵylymı jáne saraptamalyq qoǵamdastyǵynyń ókilderi qatysty.
Konferensııa barysynda qatysýshylar dinı lıderlerdiń órkenıetaralyq jáne dinaralyq dıalogti nyǵaıtýǵa, olardyń uzaqmerzimdi turaqtylyǵyna qol jetkizýge jáne halyqaralyq qaqtyǵystyń aldyn alýǵa qatysýyn keńeıtýdiń negizgi aspektilerin talqylady, sondaı-aq Álemdik jáne dástúrli dinder kóshbasshylary sezi Hatshylyǵynyń XXI otyrysynda qabyldanǵan «Álemdik jáne dástúrli dinder lıderleri sezin damytýdyń 2023-2033 jyldarǵa arnalǵan Tujyrymdamasyn» iske asyrý jóninde pikir almasty.
«Dinı kóshbasshylar men dinı dıplomatııanyń róli álemdik saıası kóshbasshylarmen, halyqaralyq uıymdarmen jáne dinı qaýymdastyqtarmen dıalog úshin mańyzdy. Álemniń jetekshi dinı kóshbasshylarynyń halyqaralyq agressorlarǵa tikeleı birlesken úndeýi qazirdiń ózinde halyqaralyq shıelenisti tómendetýi múmkin», dedi jıynda Din isteri komıtetiniń tóraǵasy E.Núkejanov.
IYU janyndaǵy ıslam, óner jáne mádenıet tarıhyn zertteý ortalyǵynyń (IRCICA) bas dırektory Mahmýd Erol Kylychtyń aıtýynsha, 2022 jyly Álemdik jáne dástúrli dinder kóshbasshylarynyń VII sezinde qabyldanǵan deklarasııa dinder kezdesetin jerlerde jemisti konsýltatıvtik negizdiń bolýyn qamtamasyz etedi. «Qujat dinder men olardyń kóshbasshylarynyń adamzat úshin ádil jáne beıbit bolashaq qurýdaǵy rólin kórsetedi», dedi ol.
Al Úndistandaǵy «Somaiya Vidyavihar» ýnıversıtetiniń rektory Samır Shantılal Somaııa júregi keń adamdar úshin álem bir otbasy ekenin atap ótti. «Klımattyń ózgerýi jaǵdaıynda biz álemdi ózimizdiń otbasymyz retinde qabyldaýdan basqa amalymyz joq ekenin túsinýimiz kerek. О́zińiz týraly oılaý – bul álem týraly oılaý. Biz qasıetti jazbalardan shabyt alýymyz kerek, ǵylym úırenýimiz kerek, shyndyqqa kóz júgirtip, áreket etýimiz qajet», dep atap ótti ol.
Konferensııa moderatory D.Esenova qatysýshylardyń baıandamalaryn qorytyndylaı kele, olarǵa is-sharany jan-jaqty jáne dáıekti qoldaǵany úshin rızashylyǵyn bildirdi, sondaı-aq dinaralyq dıalogti ilgeriletýde, beıbitshiliktiń ornyqty damýyna jáne áriptestikti odan ári keńeıtýge qol jetkizýdegi dinı kóshbasshylardyń róli orasan ekenin aıtty. Halyqaralyq onlaın-konferensııa qorytyndysy boıynsha sarapshylar álemdik jáne dástúrli dinderdiń jahandyq dıalogin damytýda elderdiń halyqaralyq bastamalarynyń mańyzdylyǵyn atap ótti, sonymen qatar dinaralyq dıalogti nyǵaıtý máseleleri boıynsha odan ári jemisti yntymaqtastyq týraly ýaǵdalastyqqa qol jetkizdi.
