Fýtboldan birinshi lıga komandalary arasyndaǵy el birinshiliginiń besinshi týry aıasynda óskemendik «Altaı» óz alańynda almatylyq «Han Táńiri» komandasyn qabyldady. Oıyn nátıjesi boıynsha qonaqqa kelgen komanda jeńiske jetip, qanjyǵasyna úsh upaıdy baılap ketti. Kezdesý barysynda tolassyz gol soǵylmasa da, oıyn qyzý tartysqa toly boldy. Árıne, mundaı básekede qaýipsizdik sharalary da joǵary deńgeıde oryndalýǵa tıis. Bul joly da «Shyǵys» óńirlik qolbasshylyǵyna qarasty 5518 áskerı bóliminiń merzimdi áskerı qyzmetshileri sporttyq shara tártibin bastan-aıaq baqylap, qyrandaı qyraǵylyq tanytty.
Taıaýda «Aqtóbe» fýtbol klýbynyń jankúıerleri Almaty metrosynda qoǵam tynyshtyǵyn buzǵan. Polıseıler qalada ǵaıbat sóz aıtyp, qoǵamdyq oryndardy lastaǵan fýtbol jankúıerlerin jaýapqa tartty. Sporttyq is-sharalarda ózin ózi ustaý erejelerin buzǵan quqyq buzýshylarǵa ákimshilik shara qoldanyldy. Al fýtbol jankúıerleriniń stadıondaǵy ersi qylyqtary budan da asyp túsedi. Este bolsa, osydan bir aı buryn Túrkııa sýperlıgasynyń 30 týry aıasynda «Trabzonspor» men «Fenerbahche» komandalary kezdesý ótkizdi. Oıyn sońyna qaraı jergilikti komanda jankúıerlerimen qonaq komanda oıynshylary arasynda tóbeles bastalyp ketti. Qazir jarys kezindegi osy olqylyqtyń saldarynan «Fenerbahche» fýtbol klýbyn sýperlıgadan alyp tastaý máselesi kóterilip jatyr. Emosııaǵa berilgen fanattardan qıturqy árekettiń túr-túrin kútýge bolady. Sondyqtan bolar, «Inter Maıamı» men Argentına quramasynyń shabýylshysy Lıonel Messıdiń oqqaǵary da oıyn barysynda fýtbolshynyń ózimen birge júgirip, qara terge túsetini bar.
Oıynshy alańnyń qaı buryshynda bolsa, alań shetimen sol aýmaqqa árli-berli júgirip álek túsip júretini ezý tartqyzady. Biraq tartysqa toly jarystarda jankúıerlerdiń oıyna ne jatqanyn uǵý qıyn.
О́skemendegi birinshi lıgada óner kórsetetin «Altaı» fýtbol klýbynyń oıynshylarynda jeke oqqaǵar joq. О́ıtkeni bul jaqta alań ortasynda oıran salatyn buzaqylardy qoıyp, oıyndy tamashalaýǵa keletin kórermen sany da neken-saıaq. Degenmen Ulttyq ulannyń sarbazdary sporttyq oıynnyń oıdaǵydaı ótýine atsalysyp, árdaıym qaýipsizdiktiń joǵary deńgeıinde qyzmet atqaryp júr.
– Men Ulttyq ulan qataryna Semeı qalasynan shaqyryldym. Bizdiń qala turǵyndarynyń fýtbolǵa degen qulshynysy alabóten. Bıyl ǵana premer lıgaǵa ótip, kóshbasshyǵa aınalǵan «Elimaı» komandasynyń árbir oıynyn jergilikti jurt taǵatsyzdana kútip, eleńdep otyrady. Aıtalyq, «Elimaıdyń» «Qyzyljarmen» ótkizgen oıynyna 8 myńǵa jýyq adam jınalǵan. Árıne, «Altaı» komandasy birinshi lıgada oınaıdy. Alaıda byltyr «Elimaıda» birinshi lıgada óner kórsetken. Sol kezde de stadıonda ıne shanshar oryn qaldyrmaǵan jankúıerlerdiń sany kóbeımese, azaıǵan joq. Al «Altaıdyń» oıynyna búgin mólshermen 40-50 adam kelgen. Biraq О́skemen qalasynyń turǵyndary fýtboldan góri hokkeıge qumar sııaqty, – deıdi 5518 áskerı bóliminiń qatardaǵy jaýyngeri Dıas Maldybaev.
Merzimdi áskerı qyzmetshi qarýlastarymen birge oıynǵa eki saǵat buryn kelgen. Quramynda kınologi bar jaýyngerlik jasaq jasyl alań syrtyn torýyldap, fýtbolǵa kelgen jurtshylyqty kóz sydyrta baqylaýǵa alady. Kúdikti kóringender bolsa, toqtatyp, tekseris júrgizedi. Al qalǵan áskerı sarbazdar bolsa jasyl alańǵa arqasyn berip, tize búkken jurtshylyqqa nazar salyp, tıesili aýmaqty baqylaýǵa alýǵa tıis. Ala dop alamanynyń qaýipsizdigin moıynyna alǵan merzimdi áskerı qyzmetshiniń biri – Aıbek Altynbekov. Ol da Ulttyq ulan sapyna Qyzylorda oblysy, Tereńózek aýdany Besaryq aýylynan shaqyrtylǵan. Jaýyngerlik jasaq qatarynda qyrandaı qyraǵy sarbazǵa stadıon aýmaǵyn baqylaýǵa alý júktelgen. О́ıtkeni qarsylas komandaǵa nemese qarsylas komandanyń jankúıerlerine tutqıyldan shabýyl jasaýǵa árekettengen buzaqy toby bolýy bek múmkin. Ulttyq ulan sarbazy osyndaı jankúıerler jaıynda joldastarynan biraz aqparat alǵan kórinedi.
– Men mektep qabyrǵasynda júrgende «Jaıdarmanda» óner kórsettim. Bir joly Qyzylorda qalasynda ótken saıysta jańa dostar taptym. Sahnada óner kórsetip bolǵannan keıin, bárimiz kıim aýystyratyn bólmede bas qosyp, áńgime-dúken quratynymyz bar. Astana qalasynan kelgen bir ázilkesh Ulybrıtanııada bolǵan eken. Ol Tumandy Albıon elinde fýtbol jankúıerleriniń qyzýqandy bolatynyn aıtty. Máselen, olar qarsylas klýbqa jankúıer ekendigińdi bilip qoısa, jaǵdaıyń múshkil degen sóz. Al seniń qarsylas komandanyń qalasynda júrgenińdi kórse, artyńnan qýyp, izińdi ańdýdan esh jalyqpaıdy eken. Olarmen kıkiljińge túsýdiń esh qajeti joq. Artyńnan ergen sýyt júristilerdi baıqap qalǵan bolsań, abdyramaı jedel taksı shaqyryp, taıyp turmasań, turǵan jerde atyp tastaýy da múmkin. Sondyqtan stadıonǵa baryp, súıikti komandaǵa qoldaý tanytqanda, emosııaǵa salynbaı, salmaqty bolǵanyń jón. Seniń komandań oıyn barysynda jeńiske jetip, onyń áserinen shattanyp, esirip, daraqylyq tanytpaýyń qajet. Qarsylas komanda jankúıerlerin mazaqtap, qol shyǵaryp qalsań, seniń túrińdi birden jattap alady. Odan keıin jalǵyz jarym júrgen jerińde taıaqtyń astyna alýy da ǵajap emes. Sondyqtan jankúıer bolýdyń da óz mádenıetin saqtaǵan jón. Shynymen, eger buzaqylyq bola qalsa, bul erteń fýtbolsúıer qaýymdy úrkitip alýǵa deıin aparýy múmkin. Mundaı buzaqylyqtar fýtbolǵa qyzyǵýshylyq tanytyp júrgen jastardyń «Soqqyǵa jyǵylyp jatqansha, úıde jatyp-aq jankúıer bolaıyn» degen kózqarasyn qalyptastyrady. Al jankúıer azaısa, eldiń fýtbol komandasyna kim jiger syılap, rýhyn oıatady? Sondyqtan ala dopqa alańmen qaraý kerek. Eger ulandyqtar árbir tártipsizdiktiń aldyn alyp, kórermenniń qorǵanyna aınalsa bul fýtbol jurtshylyǵyn arttyra túsedi dep oılaımyn. Al fýtbolshy úshin oıynnyń tartysty ótýine sebepker bórkin aspanǵa laqtyryp qýanyp, jalyndy uranymen rýhyńdy asqaqtatar kórermen qaýym, – dep aǵynan jaryldy áskerı bóliminiń qatardaǵy jaýyngeri Aıbek Altynbekov.
Jaqynda ǵana «Altaı» komandasy óz alańynda taǵy da kezekti oıyn ótkizdi. Teńbil dop tartysynyń qaýipsiz ótýine atsalysqan ulandyqtar óz mindetine árqashan minsiz, saqadaı saı daıyn.
