Foto:ashyq derekkóz
Qazir áýe aılaǵy Ekvadordan, Belgııadan, Nıderlandydan júk reısterin únemi qabyldaıdy. Kún saıyn munda gúlder tıelgen ushaqtar keledi, keıin olar búkil Qazaqstan men TMD elderine jiberiledi. Qaraǵandydan Gonkongqa mal sharýashylyǵy ónimderimen júk jetkiziledi. Al josparda – mýltımodaldy aerohab qurý kózdelgen.
Qaraǵandy oblysynyń jolaýshylar kóligi jáne avtomobıl joldary basqarmasynyń basshysy Maqsut Qojanov Gargohub Karaganda strategııalyq jobasy týraly aıtty.
«Búginde mýltımodaldy áýe habyn qurý modeli ázirlendi. Áýejaı aýmaǵynda «Saryarqa» AEA qosalqy aımaǵyn ashý qajet. Memlekettiń mindeti – ol jerde qosymsha ınfraqurylymmen qamtamasyz etý. Investor shamamen 270 mıllıon AQSh dollaryn ınvestısııalaýdy josparlap otyr. Atap aıtqanda, ushý-qoný jolaǵy men termınaldy jóndeýge, júk toraptaryn ulǵaıtýǵa kúsh salynady. Sarapshylardyń pikirinshe, jobany júzege asyrý 2 myń turaqty jumys ornyn ashýǵa jáne jyl saıynǵy salyq túsimderin 135 mıllıon dollarǵa arttyrýǵa múmkindik beredi», dedi Maqsut Qojanov.
Aýqymdy baǵdarlama 2030 jylǵa deıin ázirlendi. Búginde Qaraǵandy áýejaıy arqyly 15 myń tonnaǵa jýyq júk ótedi. Esepteýler boıynsha, aerohabtyń tıimdi damýy kezinde kólemdi 200 myń tonnaǵa deıin ulǵaıtýǵa bolady.
Sonymen qatar «Sary-Arqa» áýejaıynyń aýmaǵynda úsh jeke Qazaqstannyń júk avıakompanııasy ornalasqan. Olar on júk ushaǵyn satyp alýdy josparlady. Qazirgi ýaqytta bir ushaq satyp alynyp, ol kedendik resimdeýden ótip jatyr.
Qyrmyzy JUMAǴALIQYZY,
EUÝ stýdenti
