Ol 2010 jyldyń qazan aıynda jábirlenýshiden AQSh-tan «Rolls-Roıs» markaly avtokólikti ákelip beremin dep 50 mln teńgeden astam aqshasyn alyp, keıin qashyp ketken. Oǵan qatysty qylmystyq is qozǵalyp, halyqaralyq izdeý jarııalanady. Kúdikti elimizdiń quqyq qorǵaý organdarynan 10 jyldan astam ýaqyt boıy jasyrynyp keldi. Mundaı qylmys jasaǵany úshin múlki tárkilenip, 3 jyldan 7 jylǵa deıingi merzimge bas bostandyǵynan aıyrý jazasy kózdelgen.
Kúdiktini ekstradısııalaý Qazaqstan Respýblıkasy men Birikken Arab Ámirlikteri arasyndaǵy 2009 jyly Qazaqstan Respýblıkasynyń Bas prokýratýrasy daıyndaǵan qylmyskerlerdi ustap berý týraly kelisim negizinde júzege asty.
El turǵyndarynyń quqyqtyq saýaty artty degenimizben, áli de alaıaqtardyń arbaýyna túsip qalyp jatqandar az emes. Aqmola oblysy prokýratýrasynyń málimetinshe, osy aptanyń ózinde 18 oblys turǵyny ınternet-alaıaqtardyń quryǵyna túsip, 20 mln teńgeden astam qarajatynan aıyrylǵan.
Internet saıttary jáne áleýmettik jelilerdegi joq taýarlardy satý, ártúrli qyzmetterdi usyný týraly habarlandyrýlar, bankter men quqyq qorǵaý organdarynyń qyzmetkeri bolyp habarlasyp, aqshalaı qarajatty nemese salymdy «qaýipsiz shotqa» aýdarýdy usynatyn qońyraýlary alaıaqtyqtyń eń kóp taralǵan tásilderi bolyp tur.
Máselen, bir turǵynǵa uıaly baılanys operatorymyn degen belgisiz adam SIM-kartanyń merzimin uzartý kerek dep qońyraý shalǵan. Alaıaq oǵan silteme jiberip, sol arqyly onyń atynan nesıe rásimdegen.
Taǵy bir jaǵdaıda zeınetkerge belgisiz adam qońyraý shalyp, ózin balasy retinde tanystyrǵan jáne bank kartasynyń eki betin sýretke túsirip jiberýdi, telefon nómirine kelip túsken qupııa sózdi aıtýdy suraǵan. Osylaısha, aram oıyn iske asyrǵan ákki zeınetkerdiń atynan aqshalaı nesıe rásimdelgen.
Prokýrorlar azamattardy qyraǵy bolýǵa, satýshynyń senimdiligine kóz jetkizbesten taýar úshin aldyn ala tólem jibermeýge, qońyraý shalýshylarǵa senbeýge, ózderiniń jeke málimetterin beıtanys adamdarǵa bermeýge shaqyrady.
