Lıseı oqýshylarynyń aldynda sóz sóılegen maıor Maqsut Jumaev álemniń eń bıik shyńyn baǵyndyrǵan sáttegi áserimen bólisti.
«Biz bıiktigi 8848 metr Everest shyńyn baǵyndyryp kelgenimizge eki-úsh apta ǵana boldy. Qazaqtyń eki qyzy - Anar Burasheva men Jámılıa Bashırovanyń Táýelsiz Qazaqstan tarıhynda alǵash ret Everestti baǵyndyrýy aıtýly oqıǵa», dedi ol.
Djomolýngma bıigin úsh dúrkin baǵyndyrǵan Maqsut Jumabaev lıseı oqýshylarymen aldaǵy kúzde qaıta qaýyshyp, shyńdy baǵyndyrý jaıly túsirilgen derekti fılmdi kórsetetini týraly aıtty. Maqsut Jumaev bul jolǵy bıiktikti baǵyndyrǵan sátin Qazaqstannyń birtýar batyrlary – armııa generaly, Halyq qaharmany Saǵadat Nurmaǵambetovtyń, Halyq qaharmany Raqymjan Qoshqarbaevtyń jáne Keńes odaǵynyń Batyry Álııa Moldaǵulovanyń júz jyldyq mereıtoıyna arnaǵanyn málimdedi.
«Lıseıde jasalǵan jaǵdaılarǵa qarap, balalardyń damýy men ósýi úshin orasan zor múmkindikter jasalǵanyn aıtýǵa bolady, al olardyń qatań konkýrstyq irikteýden súrinbeı ótkendigi olardyń qajyrly eńbeginiń kórsetkishi. Olardyń alda zor, órshil maqsat qoıa bilip, sol maqsatqa jetýlerine tilektespin», dedi Everestti alǵash baǵyndyrǵan qazaq qyzy Anar Burasheva.
«Eń aldymen, kezdesý kóńilimnen shyqqanyn aıta keteıin. Áýelde, bárin basqasha elestetken edim», dep avtokrosstan Qazaqstannyń jeti dúrkin chempıony Aleksandr Artemev kezdesýden alǵan áserimen bólisti.
«Munda balalar tek sporttyq jáne áskerı pánderdi oqıdy dep oıladym, biraq lıseı oqýshylary sýret salyp, mýzykalyq aspaptarda oınaıtynyn, robototehnıkamen de aınalysatynyn kórdim. Muǵalimderdiń de quramyn qarap shyqtym jáne tek áskerı mamandardy ǵana emes, jalpy bilikti mamandardy daıyndap shyǵaratyna senimdimin. Meniń oıymsha, shyǵarmashylyq orta, tipti oqýshylardyń múmkindiginshe jan-jaqty damýyna, boıyndaǵy talanttaryn ashýyna óte qolaıly orta jasalǵan dep aıtar edim», dedi Aleksandr Artemev
«Arystan» lıseıiniń tárbıelenýshilerine sportshylar ózderiniń kásibı jetistikteri týraly aıtyp berdi. Balalar óz kezeginde sportshylardyń qaı jastan bastap kásibı sportpen aınalysa bastaǵany jaıly, kásipqoı sportshylardy ne shabyttandyratyny jáne ne alańdatatyny, qandaı maqsattar qoıyp, sol maqsatqa qalaı jetýdi josparlaıtyny jaıly túrli saýal qoıdy. Keıinnen sportshylar ozat oqýshylardyń ashyq reıtıngimen tanysyp, synyptardaǵy zamanaýı ınteraktıvti panelderdiń is júzinde qalaı jumys isteıtinin baǵalaı aldy.
«Balalardyń kózderinde ot bar, olardyń boıynan ıntellekt, qyzyǵýshylyq, bilimge degen qushtarlyqty kórdim. Árıne, áskerı tártiptiń azdap áseri bar, keıbiriniń suraqtary jattandy, birneshe ret daıyndalǵan sııaqty kóringenimen, dese de balalar meni tań qaldyra aldy. Qazir olar jeke pikirin, ómirge degen kózqarastaryn qalyptastyratyn óte qyzyqty kezeńde. Balalardyń sáttilik pen jetistikke jetip, maqsatty durys qoıyp, basymdyqtardy aıqyndaı bilýge úırenýine tilektespin», dedi Aleksandr Artemev.
Lıseı qonaqtary bilim ordasyn aralap, tır, basseın, kórkem shyǵarmalar kórmesin tamashalap, oqytý úrdisiniń qalaı uıymdastyrylǵanyn baǵalap, lıseı oqýshylarynyń jetistikterimen, sonyń qatarynda sporttyń úsh túrinen álem chempıony ataǵyn jeńip alǵan lıseıdiń on birinshi synyp oqýshysynyń jetistigimen tanysty.
«Arystan» lıseıinde «Biregeı tulǵalarmen kezdesý» formatyndaǵy is-sharalar aı saıyn ótkiziledi. Lıseı oqýshylaryna áskerıler, sportshylar, óner qaıratkerlerimen kezdesý uıymdastyrylyp otyrady. Mundaı kezdesýler bolashaq ofıserlerdiń oı-órisin keńeıtýge, olardyń boıynda jeke qabiletterin damytýǵa jáne órshil maqsattar qoıa bilýine septigin tıgizip, olardyń túrli salalarda joǵary nátıjelerge jetýine shabyttandyrary sózsiz.
