Merekelik is-shara túlekterdiń sapqa turyp, lıseıdiń týyn alyp kirý rásiminen bastaldy. Týdyń ózi oqý ornynyń bedelin, dańqyn, oqý ordasynyń dástúrlerin, ásirese bilim berý mekemesiniń áskerı daıyndyq baǵytynda bilim beretinin aıǵaqtaıdy.
«Arystan» lıseıi kýrsanttardyń ınternatta jatýy, tegin bilim alýy men oqýǵa qajetti kerek-jaraqtyń barlyǵymen qamtamasyz etýdi óziniń áleýmettik maqsaty dep tanıdy. Sondyqtan oqýǵa qabyldaý kezinde az qamtylǵan jáne kópbalaly otbasylardan shyqqan balalardy qabyldaýǵa basymdyq beredi.
«Osy kıeli shańyraqtyń túlegi bolǵanymdy maqtan turamyn. Sebebi munda tek bilimdi, belsendi oqýshylar qabyldanady. Osy lıseıge túsý úshin birneshe jyl daıyndaldym. Bul lıseı týraly ınternetten kórdim. Áskerı bilim ordalarynyń ishindegi eń bedeldisi ekenin bilgen soń birden bilimimdi shyńdaı bastadym. Bul oqý ornynda júrip elime, jerime, Otanyma degen patrıottyq sezimdi tereń boıyma sińirdim. Osyndaı alǵan bilimimniń arqasynda elimizdiń damýyna úles qosamyn dep oılaımyn», deıdi «SOS Almaty balalar qalashyǵynyń» tárbıelenýshisi.
«Arystan» lıseıi joǵary halyqaralyq talaptarǵa saı keletin, bedeldi bilim ordasy. Jyl saıyn lıseıge túsý úshin 1 orynǵa 10-12 oqýshy baq synaıdy. Olardyń ishinde bilim men densaýlyq jaǵynan tapsyrylatyn kóp satyly synaqtardan súrinbeı ótkenderi ǵana oqýǵa qabyldanady.
«Halyq» qaıyrymdylyq qorynyń dırektory Saǵynbek Shýnkeevtiń aıtýynsha, lıseı qurylǵaly beri 900-den asa túlek ushyp shyqty. Bıyl 80 kýrsant úlken ómirge joldama aldy.
«Halyq» qaıyrymdylyq qorynyń basty maqsaty – az qamtylǵan, kópbalaly otbasylardan shyqqan bilimdi balardy iriktep, olardyń sapaly bilim alýyna jaǵdaı jasaý. Kýrsanttar ınternatta jatyp tegin bilim alady. Olar barlyq kerek-jaraqpen qamtamasyz etiledi. Lıseıdiń qabyrǵasynan ushqan túlekterdiń elimizdiń bedeldi joǵary oqý oryndarynda oqýyn jalǵastyrýynyń ózi bilim ordasynyń sapa kórsetkishin bildiredi. Búginde túlekterdiń keıbiri Ishki ister mınıstrliginde, Ulttyq ulan qatarynda, Ulttyq qaýipsizdik komıteti quramynda, Shekara qyzmetinde, Tótenshe jaǵdaılar mınıstrligi men Memlekettik kúzet qyzmeti sııaqty ártúrli kúsh qurylymdarda qyzmet etip jatyr», dedi «Halyq» qaıyrymdylyq qorynyń dırektory.
Túlekterge arnalǵan saltanatty jıynda lıseı bastyǵy – general-leıtenant Murat Jáleluly Maıkeev oqý jylyn qorytyndylady. Túlekterdi quttyqtap, attestat, tósbelgiler men syılyqtar tabystady.
Aıta keteıik, «Halyq» qaıyrymdylyq qorynyń basty maqsaty – az qamtylǵan, kópbalaly otbasylardan shyqqan bilimdi balardy iriktep, olardyń sapaly bilim alýyna jaǵdaı jasaý. Qordyń únemi qoldaý bildiretin oqý oryndarynyń biri, osy «Arystan» lıseıi. 2024 jyly «Halyq» qaıyrymdylyq qory «Nursultan Nazarbaevtyń bilim berý qory» qoǵamdyq qoryna qoldaý kórsetken. Qarajat «Arystan» mamandandyrylǵan lıseıine baǵyttalǵan.
Atalǵan oqý ornyn qurý ıdeıasy 2008 jyly «Nursultan Nazarbaevtyń bilim berý qory» qoǵamdyq qorynda pedagogıka ǵylymdarynyń doktory, QR UǴA akademıgi Dınara Nursultanqyzy Qulybaevanyń jetekshiligimen jobanyń bas quryltaıshylarynyń biri jáne lıseıdiń Qamqorshylyq keńesiniń tóraǵasy Tımýr Asqaruly Qulybaevtyń atsalysýmen qurylǵan.
