«Arlan Biotech» komandasy nanodenelerdi daıyndaý úshin jasandy ıntellektiniń ozyq tehnologııalaryn paıdalanady. Joba medısına men farmasevtıka salasy úshin mańyzdy jańalyq boldy. О́ıtkeni osy nanodeneler qaterli isik pen aýtoımmýndy aýrýlardy dıagnostıkalaý men emdeýde keńinen qoldanylady. Venchýrlyq qorlardyń nazaryna ilikken bul startap aldaǵy úsh jylda jasandy ıntellekt boıynsha álemdegi eń úzdik 5 bıotehnologııalyq kompanııa qataryna qosylýdy kózdep otyr.
Jaqynda atalǵan joba AQSh-taǵy Stenford ýnıversıtetiniń bedeldi StartX halyqaralyq akselerasııalyq baǵdarlamasyna ótken edi. StartX bul tehnologııa, bıomedısına, energetıka, bilim berý syndy salalardaǵy startaptarǵa qoldaý kórsetedi. Baǵdarlama ıdeıadan bastap naryqqa sátti shyǵyp, ınvestısııalardy tartýǵa deıingi damýdyń barlyq kezeńinde jobalardy súıemeldeıdi. «Arlan Biotech» jobasynyń negizin qalaýshy ári bas dırektory Bolat Sultanqulovtyń aıtýynsha, StartX-ke qabyldaný – álemdegi kez kelgen startaptyń armany.
«2022 jyldyń qarasha aıynda alǵash ret StartH-ke ótinish bergenimde elimizden túsken alǵashqy ótinim degen bolatyn uıymdastyrýshylar. О́kinishke qaraı, ol kezde ónimimiz áli jetilmegen edi. Sol ýaqyttan beri kóp jumys atqaryldy: kofaýnderdi taptym, Astana Hub-ta akseleratordan ótip, ónimdi pysyqtap, satýdy bastadyq. Qajyrly eńbek pen kúsh-jigerdiń arqasynda osy joly irikteýden súrinbeı óttik. Endi biz álemdegi iri ınnovasııalyq qaýymdastyqtyń – Stenford ýnıversıtetiniń bir bóligi bolamyz. Bul – jumysymyzdyń mańyzyn aıshyqtaıtyn eleýli jetistik, halyqaralyq dodada básekege túse alatynymyzdyń kórsetkishi. StartX-tiń basty artyqshylyǵy – aınaladaǵy adamdar, mádenıet, draıver, ınnovasııa men álemdi ózgertýge degen umtylys», dedi ol.
2020 jyly atalǵan startapty Bolat Sultanqulov koronavırýsty dıagnostıkalaý maqsatynda qurǵan. Al 2023 jyly bul joba jasandy ıntellekt arqyly jańasha túrlendi. Jobanyń negizgi maqsaty – bıofarmasevtıkalyq kompanııalar men ǵalymdarǵa dıagnostıkalyq synaq júıelerin qurý jáne onkologııalyq, aýtoımmýndy aýrýlardy zerttep, emdeý úshin nanodenelerdi jyldam alýǵa múmkindik berý. Al nanodeneler onkologııalyq aýrýlarǵa arnalǵan jańa dári-dármekterdi jasaýda qoldanylady.
Atalǵan jobanyń teń quryltaıshysy Dáýken Seıtqalı stýdent kezinen-aq jasandy ıntellekt taqyrybyna qyzyǵýshylyq tanytqan. Alaıda 2016 jyly jasandy zerde qazirgideı tanymal emes edi. Sonda da ol neırondyq jeliler, mashınalyq oqytý kýrstarynda bilimin shyńdaı túsedi. Keıin 2019 jyly Daýken Cerebra-da bas ınjener bolyp jumysqa ornalasyp, eki jarym jyldan soń kanadalyq «healthtech» startapynda da tájirıbe jınaqtaǵannan keıin óz jobasyn qurýǵa sheshim qabyldaıdy.
«Men árqashan bıologııa men jasandy ıntellektini biriktirýge qyzyǵýshylyq tanyttym. Maǵan bıologııa salasynda jaqsy bilimi bar seriktes kerek boldy. Dál sol ýaqytta jasandy ıntellektiniń kómegimen nanodeneler men antıdeneler tizbegin qurý jobasynda izdenip júrgen Bolat Sultanqulovpen jolyqtym. Osylaısha, «Arlan Biotech» jobasy qolǵa alyndy. Sońǵy jyldary bıotehnologııa baǵytynda jasandy ıntellektini damytý belsendi damyp keledi, naryq tarapynan da qyzyǵýshylyq bar. Maman retinde damýdyń kóptegen múmkindikterin kórip turmyn, al basty maqsat — jeke adamnyń genetıkalyq faktorlary men erekshelikterin eskeretin jeke medısınaǵa kóshý», deıdi D. Seıtqalı.
Startaptyń negizin qalaýshy Bolat Sultanqulov bıomedısınalyq ınjenerııa mamandyǵy boıynsha NU PhD dárejesin alǵan. Al onyń seriktesi Dáýken Seıitqalı NU Injenerııa jáne sıfrlyq ǵylymdar mektebin bitirgen. Olardyń startapyna NU Áleýmettik damý qory, «Young Researchers Alliance» jáne «Jas Ventures» qarjylaı qoldaý kórsetken.
