Sýretterdi túsirgen – Altynbek Qartabaı
Etnoaýyl. Taý baýraıyna jaqyn mańdaǵy Jasórken aýylynyń tabıǵaty kózdiń jaýyn alady. Segiz qanatty qazaq úılerdiń tústiginde bulaq sýynyń syńǵyry estiledi. Taýdan soqqan salqyn samal kekilińdi tarap, janyńdy bir ǵajap kúıge bóleıdi. Elimizdiń ár túkpirinen kelgen 65 jastyń qýanyshynda shek joq. Etnoaýyldaǵy etnografııalyq stılde kıingen «Naqysh» tobynyń ánderi rýhyńdy kóteredi.
Atyraý men Altaı arasynan kelgen jastar 6 komandaǵa bólindi. Uldar jaǵy láńgi tebý, dástúrli sadaq atý, qazaq kúresi, qol kúresi, qoı kóterý, arqan tartys sekildi sport túrlerinen baq synasa, qyzdar jaǵy sıyr saýyp, taba nan jaýyp jarysty.
Ár salanyń jastary bas qosqan etnografııalyq joba qyzyqqa toly boldy. «Saq» komandasynyń quramynda topqa túsken qostanaılyq Jasulan Bekbolatty jaýyryny jerge tımeıtin palýan ba dedik. Jambas, ishten jáne syrttan shalý ádisterin tamasha qoldana bilgen oǵlan qarsylastarynyń barlyǵyn aıqyn basymdyqpen jeńip, ulttyq sporttan habary bar ekenin kórsetti.
Aqtóbelik Janbolat Sebeshov nebir jýan bilekti jigitterdi jeńip, qol kúresi jarysynda bilek kúshi mol ekenin baıqatty. Dástúrli sadaq atý saıysynda túrkistandyq Aıbek Táshkenbaı quralaıdy kózge atqan mergen ekenin ańǵartty.
Qoı kóterý dodasynda baq synaǵan áriptesimiz Dáýren Doǵdyrbaıdyń óneri jurtty tamsandyrdy. Bákene boıly, shaǵyn deneli jýrnalıst nebir alyp qarsylastarynyń aldyn orap ketti. Qoıdy seksen márte serpı kótergen Dáýrendi basyp ozýǵa eshkimniń shamasy kelmedi.
Balalyq shaqtyń dámi. Taba nan japqan arýlar qazir «qyzyl kitapqa» enip ketkendeı kórinetini ras. Shilińgir shildeniń kezinde mehnat tartyp, qıdyń shoǵyna nan pisiretin keıýanalardyń jalǵasy joq pa dep kúdiktenip júrgen edik. Bar eken. Ýaqyttyń tyǵyzdyǵy áser etse kerek. Keı komandadan topqa túsken arýlar pisirgen nan kúıip ketkenin kóz kórdi. Áıtse de almatylyq Dana Nurjanqyzy qarsylastarynan oq boıy ozyq ekenin kórsetti.
Sıyr saýý básekesine kelgende qyzyqtyń kókesi bastaldy. Keıbir qatysýshylar osy kúnge deıin sıyr saýyp kórmegen eken. Qobaljyp, qoryqqandary júzderinen aıqyn ańǵarylyp turdy. Áıtse de, aýylda ósken Aıaýlym Muhametqalıqyzynyń sheberligi kóz súısintti.
Joba qorytyndysynda birneshe sport túrinen úzdik shyqqan «Saq» komandasy jeńistiń eń bıik tuǵyrynan kórinip, 700 myń teńgelik sertıfıkatty ıelense, «Alash» komandasyna ekinshi oryn jáne 500 myń teńgeniń sertfıkaty buıyrdy. Úzdik úshtikti qorytyndylaǵan «Suńqar» komandasy 350 myń teńgege ıe boldy. Sondaı-aq 21 qatysýshyǵa arnaıy yntalandyrý syıaqysy tabystaldy.
«Eki jyl qatarynan uıymdastyrylǵan jobamyz máresine jetip otyr. Ulttyq dástúr men sportty dáripteý maqsatynda biz bul jobany telearnamen birlesip uıymdastyrdyq. Elimizdiń ár qıyryndaǵy jastar Jasórken aýylynda boldy. Áýlıeata óńiriniń tarıhymen tanysty. Bastysy, olar qazaqy dástúr men sportty nasıhattaýǵa úles qosty. Endi biz estafetany Túrkistan oblysyna joldaımyz» dedi oblystyq jastar saıasaty máseleleri basqarmasynyń basshysy Jomart Zulpyhar joba qorytyndysynda sóılegen sózinde.
Talaı óńirden buryn Jambyl oblysynda jastar saıasaty máseleleri basqarmasy ashylǵan bolatyn. Bizge bul joba jastar saıasaty máseleleri basqarmasy uıymdastyrǵan sońǵy is-sharalardyń biri sekildi kórindi. О́ıtkeni bul basqarma jaqyn kúnderi aqparat jáne qoǵamdyq damý basqarmasynyń qataryna qosylady.
Qalaı desek te jastar saıasaty basqarmasy sońǵy onjyldyqta kóptegen jańa jobalardy dúnıege ákelgeni anyq. Ár iske jańashyldyqpen qaraǵan ujym bir jyldary jambyldyq jastardyń jyr jınaqtaryn da shyǵaryp júrgen edi. Jańa basqarmaǵa qosylǵannan keıin tynysy taryla ma, álde jumysy jandana ma? Ýaqyt kórseter. Bastysy, olar qolǵa alǵan «JasSaq» - óńirlik jobadan ómirlik jobaǵa aınalǵanyn kóz kórdi.
Jambyl oblysy
