Sýretterdi túsirgen – Qyrmyzy JUMAǴALIQYZY
Tek taýyqtyń tós etinen ǵana ónim daıyndaıtyn seriktestik búgingi azyq-túlik jelisinde tanymal kotlet, shnısel, mıtbol, strıp men naggets sııaqty tamaq túrlerin shyǵaryp otyr. Al negizgi shıkizat – taýyq eti «Makınsk qus fabrıkasynan» keledi.
«Zaýyttyń ashylǵanyna bir aı boldy. Kúnine ártúrli ataýmen jáne túrli kólemde daıyn ónim shyǵady. Bir saǵatta 400-600 kıloǵa deıin kotlet nemese basqa da tamaq túrin daıyndaýymyz múmkin. Al esep boıynsha zaýyttyń jyldyq qýattylyǵy – 3 346 tonna. Osy ýaqytqa deıin bizdiń ónimge uqsas ónim kórshi elderden tolyqtaı ımporttalyp keldi. Endi mundaı jartylaı fabrıkattar shyǵaratyn kásiporyn ózimizde bar dep tolyq senimmen aıta alamyn. Biz ónim sapasyna kepildik beretin eýropalyq tehnologııalar men standarttardy qoldanamyz», deıdi zaýyttyń operasııalyq ister jónindegi dırektory Sanııa Omarova.
Sanııanyń sózinshe, óndiris jelisi eń zamanaýı jáne joǵary tehnologııalyq apparattarmen jabdyqtalǵan. Mundaǵy eń qajetti – etti tartý, aralastyrý, pisirý quraldary Germanııadan, belgili «Alco-food-machines» kompanııasynan shyqqan.
80-nen astam adam jumys isteıdi. Kóbi – jergilikti turǵyn. Jumys ýaqyty tańǵy 7-de bastalyp, túngi 12-ge deıin jalǵasady. Árıne, osy ýaqyt aralyǵynda qyzmetkerlerdiń eki aýysymmen jumys isteıtinin atap ótken jón.
«Jumysty «Makınsk» qus fabrıkasynan kelgen shıki taýyq etin qabyldaýdan bastaımyz. Olardy arnaýly muzdatylǵan kameralarǵa ornalastyramyz. Ár kameranyń kólemi – 64 sharshy metr. Muzdatý temperatýrasy – 18 gradýs. Keı kameranyń temperatýrasy shıkizatty paıdalaný retine qaraı bólek bolady. Sondaı-aq munda etti qýyrýǵa arnalǵan suıyq maı, tuz, un nemese ártúrli dámdeýish saqtaıtyn bólmeler de bar. Al kesý bólmesinde etti tartý, ıaǵnı farsh stanogyna daıyndaıdy. Odan soń túrli dámdeýishterdi qosa otyryp, arnaıy stanokta aralastyryp, bitken soń formalyq apparatqa jiberedi. Sol jerde apparat etti kotlet nemese shnısel, mıtbol sııaqty túrli ónim formasyna salyp, túrli qospa qosý arqyly pisirý úderisterin júrgizetin peshke jiberiledi», deıdi taýarlardy sapalyq baqylaý bóliminiń basshysy Talǵat Tursynov.
Aıtýynsha, daıyn ónim shyǵarýda óndiris jelisinde negizgi qyzmetti zamanaýı pesh atqarady. Ártúrli formadan shyqqan taýyq eti aldymen 185-190 gradýsta 30 sekýndtyq qýyrylý kezeńinen ótedi. Ol kezde et tolyq pisip úlgermeıdi, syrtqy qabaty ǵana qytyrlaq kúıde qalady. Odan soń peshke baryp, onda 165 gradýsta 7 mınýt aınaldyra pisiriledi. Al peshten shyqqan ónim -40 gradýstyq muzdatqyshqa jiberilip, jyldam salqyndatý úderisine túsedi.
«Muzdatylǵan ónimdi arnaıy qaptamada orap, túrli salmaqta daıyndaımyz. Mysaly, 600 gramnan bastap 2 kıloǵa deıin ártúrli taýyq etiniń daıyn ónimi bolýy múmkin. Ol qaptamalar taýarlyq belgisi bar 12 kılolyq qaǵaz qoraptarǵa salynyp, qoımaǵa jiberiledi. Sonda tarazyda ólshenip, kúndelikti ónim salmaǵy da anyqtalyp otyrady. Jalpy, kompanııa shıkizattan bastap ónimdi qaptaýǵa deıingi barlyq kezeńde eń joǵary sapaǵa kepildik beredi. Bizde daıyndalǵan daıyn fabrıkattardyń jaramdylyq merzimi – 90 kún», deıdi Talǵat.
Baıqaǵanymyzdaı, seh ishine barlyq jumysshy basynan aıaǵyna deıin túgel zalalsyzdandyrylyp, shash nemese basqa da zattar ónimge túspeý úshin arnaıy kıimmen ǵana kirgiziledi. Eger ol tártip saqtalmaǵan jaǵdaıda avtomatty túrde kire beristen «jasyl» belgisi qosylmaıdy, ondaı jaǵdaıda ol qyzmetkerge seh ishine barýǵa ruqsat berilmeıdi.
Kásiporyn aldaǵy ýaqytta óziniń óndiristik qýatyn jylyna 10-12 myń tonnaǵa deıin ulǵaıtýdy josparlap otyr. Joba iske assa, qyzmetker sany 150-ge deıin kóbeıedi. Sondaı-aq kórshiles elderge ónimdi eksporttaý jóninde qujattar da ázirlenip jatqan kórinedi.
