Esek úıiri Baızaq, Talas aýdandarynyń órisin toltyrǵan. Áńgisi aqyryp, bıesi baqyryp, 4 aýyldyń berekesin alady deıdi jurt. Basynda 1 700-deı bolǵan esektiń sany qazir 2 300 basqa kóbeıgen. Biraq baǵytyn qaıyryp baǵyp, óristetken eshkim joq. Sóıtse, jer ıesi esek jınaǵan azamatpen kelisimdi buzyp, qorshalǵan qoranyń esigin ashyp jibergen.
- Bos jatqan jerdi ýaqytsha bergen. Sodan biz qolǵa alǵannan keıin ol ana kelisimshart jasasqan adammen kelisimin buzdy ǵoı, – deıdi Baızaq aýdandyq aýyl sharýashylyǵy bóliminiń basshysy Erkebaı Rysalıev.
Belgili bolǵandaı, bul esek ónerkásibin damytýǵa bastalǵan joba eken. Jeke adamnyń jerin jalǵa alǵan azamat jer-jerden 25-30 myńnan esek alyp, jınaǵan. Endigi jerde onyń sanyn 10 myńǵa jetkizý josparlanyp otyr. Osylaısha, ınvestısııa quıýǵa nıet bildirgen ınvestormen óńir basshylary aqyldasypty.
- Biz esek sharýashylyǵyn damytyp, ónimin Qytaıǵa alyp ketpekpiz. Qazir esek basyn 10 myń basqa jetkizý jospary bar. Onyń súti, eti – túrli dári shyǵarýǵa taptyrmas shıkizat. Suranys óte zor. Bizge baǵýǵa, jem-shóbin ázirleýge 10 myń gektardaı jer bolsa jetedi. Ákimdikpen kelissóz júrgizdik, – deıdi qytaılyq ınvestor Sýı Chyn Yn 31 arnaǵa bergen jaýabynda.
Joba iske assa, óńirge 50 mıllıon ıýan, ıaǵnı 3,5 mılıard teńge ınvestısııa quıylady. Bul usynysqa jergilikti bıliktiń búıregi burylǵandaı. Al etiniń elge tarap ketpeýine esh kúmán bolmaýy kerek.
- Esekterge chıp salyp, sol chıpterdi bazaǵa engizip, tirkeýge alý máselesi jolǵa qoıyldy. Abaı atamyzdyń da «Esektiń artyn jýsań da mal tap» degeni bar, – deıdi Jambyl oblystyq veterınarııa basqarmasy basshysynyń orynbasary Oljas Kókeı.
Osylaısha, kóp uzamaı Jambyl oblysynan esek etin eksporttaý qolǵa alynatyn boldy. Alaıda ázirge jeri joq ınvestor myńǵyrǵan esekti basy aýǵan jaqqa jiberýge májbúr.
