Sharaına
AQSh-tyń vıse-prezıdenti Djo Baıdenniń úıi janynda oq atyldy. «Assosheıted press» aqparat agenttiginiń habarlaýynsha, oqıǵa jeksenbi kúni bolǵan.
Vıse-prezıdenttiń kúzetshileri atylǵan oqtyń únin jergilikti ýaqyt boıynsha saǵat 08.30-da estigen. Bul ýaqytta Baıden zaıybymen birge basqa úıde bolypty. Quqyq qorǵaý organdarynyń qyzmetkerleri úı janynan avtomobıl júrgizýshisin ustaǵan. Olardyń aıtýynsha, oq atqan osy adam bolýy múmkin. О́ıtkeni, ol ustaý barysynda kádimgideı qarsylyq kórsetken kórinedi. Osy oqıǵa jaıly AQSh prezıdenti Barak Obama men vıse-prezıdent Djo Baıdenge aqparat berilgen.
Túriktik mafııanyń qatysy bar sııaqty
«Islam memleketi» terrorshyl toptarynyń sodyrlary Parıjdegi terrorlyq áreketterge qatysy bar dep kúdik keltirilgen Haıat Býmeddendi Sırııaǵa ótkizýdi qamtamasyz etý úshin túriktik mafııaǵa aqsha tólegen sııaqty.
Bul jóninde «The Mirror» basylymy Túrkııa barlaý qyzmetiniń derekterine silteme jasaı otyryp jazdy. Basylymnyń keltirgen derekterine qaraǵanda, Býmedden men mafııa ókilderi Ystambul áýejaıynda kezdesken. Sodan keıin olar Túrkııanyń El-Abıad qalasyna jetip, ári qaraı Býmeddendi Sırııanyń shekarasyna ótkizip jiberipti. Túrkııanyń barlaý qyzmeti osy áreketti júzege asyrǵany úshin «Islam memleketiniń» sodyrlary túriktik mafııaǵa qomaqty aqsha tóledi degen derek keltiredi. Biraq, kúdikti dep sanalǵan Haıat Býmedden Parıjde jasalǵan terrorlyq áreketter kezinde, onyń Fransııa aýmaǵynan tysqary jerde bolǵany rastalyp otyr.
El prezıdentiniń qaıda ekeni belgisiz
Iemenniń astanasy – Sana qalasynda áskerı bólimsheler áskerleri men shııttik kóterilisshiler arasyndaǵy urys boldy. Bul jóninde «Assosheıted press» agenttigi aqparat taratty.
Qarýly urysty kórgenderdiń aıtýynsha, prezıdent saraıy ornalasqan aýmaqta iri kalıberli pýlemetterden oq atylǵan jáne mına jarylystary estilgen. Artynsha aspanǵa qoıý qara tútin kóterilgen. El prezıdenti Abda Rabbo Mansýr ál-Hadıdiń qaıda ekeni ázirge belgisiz bolyp otyr. Atys saldarynan sol aýmaqtaǵy turǵyndar úılerin tastap ketken. Osydan úsh kún buryn shııttik kóterilisshiler el prezıdenti ákimshiliginiń basshysy Ahmed Avad ben Múbárakti urlap ketken bolatyn.
Endi kamerýndyqtarǵa da aýyz saldy
Nıgerııalyq «Boko haram» ekstremıstik uıymynyń sodyrlary jeksenbi kúni Kamerýnniń soltústiginde 80-ge jýyq adamdy urlap áketti. Olardyń kópshiligi balalar eken.
Keıbir aqparattar boıynsha, ekstremısterdiń shabýylynan úsh adam mert bolǵan, urlanǵan balalar men qyzdardyń jas mólsheri 10-15 jas aralyǵynda kórinedi. Turǵyndardyń aıtýynsha, shabýyl kezinde Mabass derevnıasyndaǵy 80-nen astam úı qıratylǵan. Shuǵyl jetken Kamerýn áskerleri men ekstremıster arasyndaǵy atys eki saǵatqa sozylypty. «Boko haram» – radıkaldy ekstremıstik uıym, olar ótken jyldan beri Nıgerııa aýmaǵynda jáne osy elmen kórshiles memleketterde oıran salyp keledi.
Groznyıda qarsylyq mıtıngisi ótti
Keshe Groznyı qalasynda Muhammed paıǵambardyń sýretin buqaralyq aqparat quraldarynda kelemejdep salýǵa qarsylyq bildirilgen mıtıng ótti.
Qarsylyq sherýi Mınýtka alańynan bastalyp, jınalǵan halyq «Cheshenstan júregi» meshitine qaraı bet aldy. Osy ımandylyq úıinde ujymdyq namaz oqyldy. Meshit janynda «Biz Muhammed paıǵambardy súıemiz» dep jazylǵan plakat ilýli turdy. Al aksııa Cheshenstan dinı qaýymynyń bastamashy bolýymen uıymdastyryldy. Oǵan 1 mıllıonnan astam adam qatysty. Bul sońǵy ýaqytta Reseıdegi musylmandardyń uıymdastyrǵan alǵashqy aksııasy emes. Osynyń aldynda, ıaǵnı 17 qańtarda Ingýshetııada «Islam – terrorızm men ekstremızmge qarsy» degen mıtıng ótken bolatyn.
Jıhadshylarǵa qatysty saıasatty synady
«Ulttyq maıdan» jetekshisi Marın Le Pen Fransııanyń jıhadshylarǵa qatysty saıasatyn synady. Osyǵan baılanysty óz oıyn ol «Nıý-Iork Taıms» basylymyndaǵy maqalasynda keltirgen.
Marın Le Penniń pikiri boıynsha, azyq-túlik satylatyn sýpermarkette kepildikke alynǵandardy atqan terrorıst Amedı Kýlıbalı Fransııa shekarasynda kedendik baqylaýdyń bolmaýynan, ol avtomatty Belgııadan alýy múmkin. Sondaı-aq, Le Pen EO-ǵa múshe elder arasynda adamdar men taýarlardyń erkin qozǵalysy H.Býmeddenniń Sırııaǵa qashyp ketýine múmkindik berip otyr dep esepteıdi. Jáne ol zańdy jáne zańsyz jolmen kelip jatqan mıgranttar Fransııanyń qundylyqtary men zaıyrlylyq sıpatyna qaýip tóndiretinin atap ótipti.
Qysqa qaıyryp aıtqanda: *О́tken jyldyń jeltoqsanynda Eýropalyq sot HAMAS qozǵalysyn terrorshyl uıymdar tiziminen shyǵarý týraly sheshim qabyldaǵan bolatyn. Eýropalyq odaq sottyń bul sheshimine qarsy shaǵym beretinine yqtımal ekenin bildirdi. *Zımbabveniń shyǵysynda eki avtobýstyń soqtyǵysýy saldarynan 25 adam mert bolyp, 46 adam jaraqat aldy. Apat joldyń sapasyzdyǵynan oryn alǵan sııaqty. *Avstralııanyń syrtqy ister mınıstri Djýlı Bıshop Tvıtter qoldanýshylarynan joǵaltyp alǵan syrǵasyn tabýǵa kómektesýdi ótindi. Tabylǵan jaǵdaıda ózine qalaı habarlasý kerektigin de jazypty. *AQSh bıligi First National Bank of Crestview bankisiniń qyzmetin toqtatty. Bul bank bıylǵy jyly elde jabylǵan alǵashqy kredıttik uıym bolyp sanalady.
Internet materıaldary negizinde ázirlendi.
