Tarıhı dep otyrǵan sebebimiz, zaýyt 1982–1984 jyldary salynyp, iske qosylǵan. Sol jyldary Qandyaǵash temir-beton buıymdaryn shyǵarý zaýytynyń Qazalydaǵy seh bólimshesi retinde jumys istepti. Al 1986 jyly Qazaly temir-beton buıymdary men konstrýksııalaryn shyǵarý zaýyty bolyp ózgerip, basshylyq Qazaly stansasyna kóshirilgen.
Toqyraý jyldary san ret daǵdarysqa ushyraǵan kásiporynnyń ataýy ol ýaqytta da birneshe ret ózgerdi. Birde Túrkistan temirjoly, endi birde «Qazaqstan Temir Joly» RMK quramyndaǵy «Jeldorstroıǵa» qarasty mekeme boldy. Ataýy ózgergenmen ónim túrin ózgertpegen zaýyt 2013 jyldan bastap «LCI-MK» JShS Qazaly fılıaly bolyp jumys istep keledi.
«Qazirgi kezde zaýytqa tapsyrys berýshiler kóbeıip keledi. Bir kezderi kásiporyn óńirdegi «100 mektep, 100 aýrýhana» baǵdarlamasynyń iske asýyna aıtarlyqtaı úles qosty. Aýyzsý tartý jumystaryna sáıkes kóptegen tapsyrysty oryndap keledi. Sondaı-aq kezinde «Batys Eýropa – Batys Qytaı» jol qurylysyna qajetti temir-beton buıymdaryn óndirýge 2010 jyldan bastap beıimdelip, qosymsha qurylystar salyp, keıingi tehnologııamen 18, 21, 24 metrlik kópir qurylysyna qajetti temir-beton balkalaryn, qubyrlardy daıarlady. Odan soń respýblıkalyq jobanyń biri bolǵan «Sekseýil – Jezqazǵan», «Shalqar – Beıneý» temirjol qurylysynda da atalǵan zaýyttyń óz qoltańbasy bar. Qazir avtomobıl jolyndaǵy kópir qurylysyna qajetti qada men qubyrlardy, joǵary kerneýli jelige arnalǵan VL10kV dińgekterin, sondaı-aq úı qurylysyna qajetti temir-beton buıymdaryn sońǵy tehnologııamen óndiredi» deıdi aýdandyq kásipkerlik jáne ónerkásip bóliminiń basshysy Aqtileý Bóriqulaqov.
«LCI-MK» seriktestiginde 80-nen asa jumys isteıdi. Zaýytta arnaıy óndiristik kıim beriledi. Sondaı-aq zııandy sehta jumys isteıtinderge sút ónimderin berý uıymdastyrylǵan. Ekinshiden, jumysshy qaýymnyń 14 jasqa deıingi balalaryna jylyna bir ret Almaty qalasyndaǵy «Maralsaı» demalys úıine joldama beriledi. Aıta keteıik, jumysshylardyń ortasha eńbek jalaqysy 220-250 myń teńgeni quraıdy. Maman biliktiligin arttyrý mekemede durys jolǵa qoıylǵan.
«Seriktestiktegi basshylar tarapynan Qazaly bólimshesiniń jumys kólemin arttyrýyna kóp kóńil bólinip jatyr. Qarajat kózin qarastyryp, qosymsha qurylys salýǵa kiristi. Mysaly, uzyndyǵy 32 metr, árqaısysy 20 tonnadan kóteretin 2 kótergish kran quryldy. Jańa 20 tekshe metrlik kompressor stansasy iske qosyldy. Osydan biraz jyl buryn bý qazandyǵy sehyna otyn retinde tabıǵı gazdy paıdalaný, ıaǵnı gazdandyrý jumystary tolyq aıaqtalǵan edi. Búginde zaýyt ákimshiligi ekologııaǵa, adam densaýlyǵyna teris áser tıgizetin qatty otyn – kómirdiń ornyna «kógildir otyndy» paıdalanyp keledi», deıdi kásipkerlik jáne ónerkásip bóliminiń jetekshi mamany Arystanbek Qanat.
Kásiporynda avtomobıl kópir qurylysyna qajetti «VTK-33Ý» markalyaralyq qurylys balkalaryn quıý tehnologııasy ıgerilip, qazir Oral qalasyndaǵy kópir qurylysyna jóneltilip jatyr. Qosymsha tehnıka men qondyrǵylar alyp, tapsyrys pen suranysqa sáıkes jumys kúshin jyl sanap ulǵaıtyp keledi.
