Foto: zakon.kz
Elimizde memlekettik jáne jergilikti atqarýshy organdarǵa túrli qyzmet pen is-sharaǵa jumsalatyn artyq shyǵyndy qysqartý jóninde tapsyrmalar berilgen edi. Alaıda keıbir memlekettik organdar bul tapsyrmany oryndamaıtyny jıi baıqalady. Máselen, Jylyoı aýdanynda sáýir aıyndaǵy sý tasqynynyń zardabyn joıý áli jalǵasyp jatyr. Turǵyndardyń keıbiri baspanasyz qaldy. Osyndaı qıyndyq týyndaǵan aýdanda at sporty túrlerinen jarys ótkizý josparlanypty. Sybaılas jemqorlyqqa qarsy is-qımyl agenttigi Atyraý oblystyq departamentiniń baspasóz qyzmetiniń deregine qaraǵanda, Jylyoı aýdanynyń mádenıet, tilderdi damytý, deneshynyqtyrý jáne sport bólimi sporttyq is-sharaǵa 22 mln 321 myń 429 teńgeni jaratýdy josparlapty. Biraq eriktilerdiń usynysymen satyp alý konkýrsy tolyǵymen toqtatyldy.
Bıýdjetten bólingen qarjyny únemdeýge mán bermeıtinderdiń qatarynda mektepter jıi kórinis beredi. Bilim ordalary qajetti taýardy satyp alý úshin qarjyny ońdy-soldy jumsaýǵa nege áýes? Tipti mektepter memlekettik satyp alý konkýrsyn ótkizýden bura tartý «básekesine» túsken sekildi kórinetini kóńilge kirbiń uıalatady. Sybaılas jemqorlyqqa qarsy is-qımyl agenttigi Atyraý oblystyq departamentiniń basshysy Erulan Serikqalıevtiń aıtýynsha, bilim salasyndaǵy sybaılas jemqorlyq táýekelderin syrtqy taldaý qorytyndysymen berilgen 12 usynystyń 8-i ǵana oryndalypty. Alaıda bilim basqarmasyna qarasty mekemelerdiń beınebaqylaý júıelerine onlaın qosylý múmkindigi, salystyrýlardy avtomatty túrde júrgizý arqyly aıyrmashylyqtardy anyqtaý múmkindigimen býhgalterlik esep júıesin «K2 Qazynashylyq-klıent» baǵdarlamasymen ıntegrasııalaý, aqyly qyzmet kórsetetin qosymsha bilim berý uıymdarynda baǵa kalkýlıasııasyn bekitý sekildi usynystar oryndalmady.
«Is-sharalar josparynda kórsetilgen osy usynystar bilim berý salasyndaǵy táýekelderdiń aldyn alýǵa, týyndaýyn boldyrmaýǵa yqpal eter edi. Taldaý nátıjesinen keıin 1 qylmystyq is qozǵaldy. Bıýdjettiń 90 mln teńge kólemindegi qarjysyn zańsyz jumsaý deregi, 9 sybaılas jemqorlyq táýekeli anyqtaldy. Departamenttiń aralasýymen 7 mln teńge bıýdjetke qaıtaryldy», deıdi Erulan Serikqalıev.
О́tken jyldan beri sybaılas jemqorlyqqa qarsy volonterler memlekettik satyp alý konkýrsyna monıtorıng júrgizýdi qolǵa aldy. Máselen, Mahambet aýdandyq bilim bólimine qarasty Z.Eshanova atyndaǵy balalar óner mektebi fortepıanonyń bir danasyn 1 mln 510 myń teńgege satyp alýdy josparlaǵany anyqtaldy. Osylaısha, 10 mýzykalyq aspap úshin jalpy somasy 15 mln 104 myń teńgeni jumsaý kózdelipti. Volonterler júrgizgen monıtorıngke sáıkes, mýzykalyq aspaptyń ortasha baǵasy 651 myń 544 teńge ekeni anyqtalyp otyr.
«Eriktiler aralasqannan keıin taýardyń baǵasy ózgertilip, bir danasy úshin 870 myń teńge bolyp belgilendi. On mýzykalyq aspaptyń baǵasynan 6 mln 404 myń teńge kólemindegi bıýdjet qarjysy únemdeldi», dep habarlady departamenttiń baspasóz qyzmeti.
Osy aýdandaǵy Jalǵansaı orta mektebi 90 dana partanyń árqaısysyn 121 myń 428 teńgeden satyp alý úshin 10,9 mln teńge bólipti. Alaıda bul taýardyń ortasha baǵasy 30-40 myń teńgeni quraıtyny eskerilmegen. Eriktilerdiń usynysynan keıin tapsyrys berýshi 1 partanyń baǵasyn 2,5 esege – 44 myń 642 teńgege tómendetipti. Sóıtip, satyp alynatyn partalardyń sanyn 208 danaǵa deıin kóbeıtip, 9,2 mln teńgege satyp alýdy qaıta jarııalady.
Mahambet aýdanynda osyǵan uqsas taǵy bir jaıt baıqalyp otyr. Naqtylaı aıtqanda, aýdandyq bilim bólimine qarasty Q.Qalybekov atyndaǵy Sarytoǵaı orta mektebi 16 mln 607 myń teńgege 2 dana ulttyq kıiz úı satyp almaq bolǵan. Konkýrsta bir kıiz úıdiń baǵasy 8 mln 303 myń 571 teńge dep kórsetilgen.
«Eriktiler júrgizgen monıtorıng kezinde uqsas taýardyń medıanalyq baǵasy 2 mln 650 myń teńgeni quraıtyny anyqtaldy. Monıtorıng nátıjesimen satyp alý joıylyp, bıýdjet qarjysynyń tıimsiz jumsalýyna jol berilmedi. Jyl basynan beri sybaılas jemqorlyqqa qarsy eriktiler 130 mln teńgeden astam bıýdjet qarajatyn únemdedi», dep málim etti departamenttiń baspasóz qyzmetinen.
Al Qyzylqoǵa aýdanyndaǵy№9 orta mektebi kúzet qyzmeti úshin 48 mln teńge tóleýdi usynypty. Biraq taldaý kórsetkendeı, oblysta bilim berý ǵımarattaryn kúzetý qyzmetiniń ortasha baǵasy 3,5 mln teńgeni quraıdy eken. Taǵy da sybaılas jemqorlyqqa qarsy volonterlerdiń satyp alý úderisine taldaý júrgizgennen soń kúzet qyzmetiniń baǵasy 12 esege, 4 mln teńgege tómendetildi.
Atyraýlyq eriktiler jyl basynan beri bıýdjetten bólingen 130 mln teńgeniń negizsiz jumsalýyna jol bermedi. Onyń ishinde bıyl birinshi toqsanda bıýdjettiń 53,9 mln teńgeden astam qarjysy únemdelgen.
Atyraý oblysy
