foto: Polisia.kz
Kelisimniń basty maqsaty – salaýatty ómir saltyn nasıhattaý, elimizde olımpıadalyq qozǵalystyń turaqty damýyn qamtamasyz etý.
«Sport» pen «polısııa» jaqyn uǵymdar. Buǵan Ishki ister mınıstrligi janyndaǵy «Dınamo» dene shynyqtyrý-sport qoǵamy dálel bola alady. Atalmysh uıym – sport sańlaqtarynyń qara shańyraǵy, otandyq sporttyń ajyramas bóligi.
«Búgingi kezdesý sportty damytý men joǵary nátıjelerge qol jetkizýdegi ózara is-qımylymyzdy jalǵastyrady dep senemin. Táýelsizdik jyldary olımpıada oıyndarynda jeńip alǵan 71 medaldiń 66-sy «Dınamo» qoǵamynan shyqqan sportshylarǵa tıesili ekenin atap ótkim keledi», dedi Ishki ister mınıstri Erjan Sadenov.
Tájirıbeli boksshy, el maqtanyshy Gennadıı Golovkın de «Dınamo» qaýymdastyǵynan shyqqan. Ulttyq olımpıada komıtetiniń basshysy otandyq sportty damytý birlesken kúsh-jigerdi qajet etetin jaýapty is dep sanaıdy.
«UOK bizdiń olımpıadashylardy daıarlaýda Ishki ister mınıstrliginiń qoldaýyn joǵary baǵalaıdy. Bizdiń yntymaqtastyǵymyz Qazaqstanda sportty odan ári damytýǵa jáne sportshylarymyzdy álemdik arenadaǵy jańa jeńisterge jeteleýge yqpal etetinine senimdimin. Bárimizde bir mindet. Birlesip jumys isteımiz», dedi Gennadıı Golovkın.
Kezdesý sońynda IIM basshysy halyqaralyq sportty damytýǵa qosqan úlesi úshin bylǵary qolǵap sheberin vedomstvolyq medalmen marapattady.
