foto: www.gov.kz
Sport saraıynyń kireberisinde is-shara qonaqtaryna, qala turǵyndaryna arnalǵan merekelik oıyn-saýyq, saýda-sattyq, fotozonalar uıymdastyryldy. Kelýshilerge balmuzdaqtar taratyldy.
Resmı bólimi bastala sala «Qazsınk» kompanııasynyń bas dırektory Janat Janbotın beınequttyqtaý joldady.
– Osy mereke kúni men barsha eńbekkerlerimizdi kásibı jetistikteri men elimizdiń ónerkásibin damytýǵa qosyp júrgen eleýli úlesteri úshin shyn júrekten quttyqtaımyn. Barshańyzǵa myqty densaýlyq, otbasylaryńyzǵa amandyq, baq-bereke tileımin. Ár kúnderińiz tek qýanysh pen sáttilik ákelsin! – dedi Janat Dúısenuly.
Jıynda otandyq metallýrgııanyń bastaýynda turǵan eńbek áýletterine de qurmet kórsetildi. Olar týraly beınerolıkter kópshilik nazaryna usynyldy.
Saltanatty keshte dástúr boıynsha «Izgi júrek» marapaty tabystaldy. «Qazsınk» kásiporny taǵaıyndaǵan atalǵan syılyq óz ómiri men densaýlyǵyn qaterge tige otyryp, adamdardy qutqaryp qalǵan erjúrek azamattar qashanda qurmetke laıyq. Bir aı boıy izgi-jurek.kz saıtynda úmitkerlerge daýys berý júrgizildi. Úsh jeńimpazdyń árqaısysy osy keshte arnaıy shaǵyn músinder men 1 mln teńge mólsherindegi aqshalaı syılyqqa ıe boldy.
Syılyq ıegeri Andreı Smolnıkov órtenip jatqan úıden eki bala men olardyń analaryn alyp shyqsa, Denıs Shemet oqý-jattyǵý kezinde kenetten jarylǵan jaýyngerlik granatadan jas sarbazdy óz denesimen jaýyp qalǵan. Ofıser ózi jaraqattanǵanymen, sarbaz din-aman.
– Oqý-jattyǵýda oqys oqıǵa boldy. Jaýyngerlik granat sarbazdyń qasyna qulady. Jarylatynyn bildim. Oılanyp turatyn emes, birden álgi soldatty óz denemmen qalqalap qalýǵa tyrystym. Granatanyń úsh jaryqshaǵy maǵan tıgen eken, ekeýi áli de meniń denemde júr, – deıdi Denıs Shemet.
Úshinshi syılyq Buqtyrma sý qoımasynda sýǵa batyp bara jatqan 13 jasar jetkinshekti qutqarǵan TJD qyzmetkeri Elaman Nuqyshevke berildi. Batyl jigitterge syılyqtardy Olımpıada chempıony, ataqty jeńil atlet Olga Rypakova tabys etti.
Qurmet kórsetilip, alǵys aıtylǵan soń «Qazsınk daýysy» shyǵarmashylyq baıqaýynyń fınalısteri sahnaǵa shyǵyp, óz ónerin kórsetti. Olardyń bári de – osy kompanııanyń qarapaıym qyzmetkerleri. Dese de, ónerden qur alaqan emes ekenin dáleldedi. Saltanatty kesh sońynda belgili ánshiler Karına Abdýllına men Sadraddın óner kórsetip, jastarǵa qýanysh syılady.
