Ál-Farabı atyndaǵy Qazaq ulttyq ýnıversıtetindegi hımııa jáne hımııalyq tehnologııa fakýltetiniń ǵalymdary ota kezinde paıdalanylatyn hırýrgııalyq jipti jetildirip, betine antıbakterıaldy jabyn jasap shyǵardy. Bul týraly Ǵylym jáne joǵary bilim mınıstrligi habarlady.
– Hırýrgııalyq jipterdiń adam aǵzasy sekildi qorǵanysh mehanızmi joq. Iаǵnı zııandy mıkroorganızmderge ońtaıly ortaǵa jatady. Sondyqtan olar tez jabysyp, ónip, óse beredi. Bizdiń ǵylymı toptyń maqsaty – hırýrgııalyq jipterdiń betine antıbakterıaldy jabyn jasap, ony qoldanysqa engizý. Jipterdiń betine mýltıqabatty nanoólshemdegi jabyndar ornatylady. Al sońǵy qabatqa antıbakterıaldy agent engiziledi. Antıbakterıaldy agenttiń qarapaıym antıbıotıkterden aıyrmashylyǵy – bakterııalarǵa jedel qarsy áreket etýinde, – deıdi zerthananyń ǵylymı qyzmetkeri Aıajan Seıdýllaeva.
«ChemMedLab» ǵalymdarynyń aıtýynsha, búginde medısına qyzmetkerleri ota jasaǵanda jarany hırýrgııalyq jiptermen tigedi. Keı jaǵdaıda jipterdiń betine bakterııalar ornyǵyp, ınfeksııa týdyrady. Bul qaıtadan ota jasaýǵa alyp keledi. Qaıta-qaıta ota jasaý adam ómirine qaýip tóndirýi de múmkin. Qazir ýnıversıtet ǵalymdary ǵylymı joba boıynsha patent aldy. Sonymen qatar álemdik jýrnaldarǵa maqalalaryn jarııalady. Atalǵan ınnovasııalyq jobaǵa ota kezinde qoldanylatyn hırýrgııalyq jipterdi shyǵaratyn «RuMa Farm» kompanııasy qyzyǵýshylyq tanytyp, ǵalymdarmen birigip jumys isteýge daıyn ekenin aıtqan.
– Antıbakterıaldy jipterdiń analogteri álemdik naryqta bar. Degenmen elimizde bul joba alǵash ret júzege asyp otyr. Ota kezinde hırýrgter jipterdi spırtke nemese hlorgeksıdın eritindisine salyp, jarany tigedi. Biraq bul tásildiń kemshiligi bar. Iаǵnı uzaq ýaqyt shydamaı, adam ómirine zııan keltirýi múmkin. Al biz daıyndaǵan jipterdiń jabyndary bolady. Olar kerek kezinde bakterııamen kúresip otyrady. Sondaı-aq antıbakterıaldy agent bir aı boıy bakterııaǵa qarsy kúresedi, – dep túsindirdi A.Seıdýllaeva.
Ǵylymda jańalyq ashyp, el ıgiligine jumys isteıtin ǵalymdar munymen toqtap qalmaq emes. Bolashaqta atalǵan joba boıynsha tereń zertteý júrgizip, naryqqa shyǵamyz dep otyr.
