Taratyp aıtqanda, tasqynnan Aqtóbe qalasynda – 200, Oıyl aýdanynda – 307, Yrǵyz aýdanynda –160, Qobda aýdanynda – 155, Muǵaljar aýdanynda – 69, Temir aýdanynda – 57, Áıteke bı aýdanynda 51 turǵyn úı turýǵa múlde jaramsyz bolyp qaldy. Sondaı-aq Baıǵanın aýdanynda – 8, Mártók aýdanynda – 5, Alǵa aýdanynda 2 úı qırap qaldy. Aqtóbe qalasynda úıi sýǵa ketken 200 otbasyǵa jańa páter satyp alýǵa sheshim shyǵarylsa, 138 otbasy jańa páterlerge kirip úlgerdi. Oıyl aýdanynda – 130, Muǵaljarda – 55, Temirde – 36, Yrǵyzda – 35, Áıteke bı aýdanynda – 25, Baıǵanın aýdanynda – 8, Qobda aýdanynda – 8, Mártókte – 5, Alǵa aýdanynda 2 baspana satyp alyndy.
Oıyl aýdanynyń Qaratal eldi mekeninde sý tasqyny kezinde 210 turǵyn úı, mádenıet úıi, balabaqsha, kitaphana búlindi. Komıssııa uzaq ýaqyt sýdyń astynda turǵan aýyldaǵy áleýmettik nysandardy qaıta qalpyna keltirý múmkin emes degen qorytyndyǵa keldi. Qaratal aýylynda mamyrdyń sońynan bastap 11 merdiger 120 úıdiń qurylysyn bastady. Búginde salynyp jatqan 120 úıdiń qabyrǵalary kóterilip, 65 úıdiń shatyry jabylsa, 30 úıde ishki árleý jumystary júrip jatyr. Jańa baspananyń salynýyn kútpegen osy aýyldaǵy 60 otbasyǵa aýdan ortalyǵy Oıyldan daıyn úıler satyp alyndy. Yrǵyz aýdanynyń Nura aýylynda turǵyn úı qurylystary kesheýildep bastaldy. Kúzge deıin osy aýyldaǵy qurylys jumystary aıaqtalmaı qalýy múmkin.
Sý tasqynynan óńirde 69 kásipkerlik nysany zardap shekti. Tasqyn kezinde shaǵyn jáne orta kásipkerlik nysandaryna keltirilgen múliktik shyǵyndardyń ótemaqysyn anyqtaý jónindegi óńirlik komıssııaǵa 22 kásipker aryzdansa, 17 kásipkerge 230,7 mln teńge somasynda ótemaqy tóleý týraly sheshim shyǵaryldy. Sonyń ishinde eń kóp zardap shekken Aqtóbe qalasy men Temir aýdanynda ornalasqan 6 kásipkerlik nysanyna 63,5 mln teńge kóleminde ótemaqy tólenetin boldy. Yrǵyz aýdany boıynsha kásipkerler shyǵyndary áli túgendelip bolǵan joq. Dúnıe-múlki, ǵımaraty búlingen kásipkerlerdiń ótemaqy alýǵa baılanysty ótinishteri osy jyldyń 30 qarashasyna deıin qabyldanady.
Aqtóbe oblysy
