Islam ǵylymı-zertteý ınstıtýtynyń ashylý saltanatyna Bas múftı Naýryzbaı qajy Taǵanuly, jazýshy Smaǵul Elýbaı, akademık Asqar Jumadildaev bastaǵan zııaly qaýym qatysty. Instıtýttyń negizgi maqsat-mindeti – ǵasyrlar qoınaýynan jetken rýhanı-dinı kóne qoljazbalar men eski kitaptardy kadıkologııa-mátintanýlyq turǵydan zerdelep, saraptaýǵa, ony ǵylymı aınalymǵa engizýge, búgingi qoǵam suranysyna oraı qaıta jaryqqa shyǵarýǵa úles qosý.
«Memleket basshysy Qasym-Jomart Toqaev Úkimet múshelerimen ótken basqosýda: «Halqymyzdyń dúnıetanymyna saı dástúrli Islamdy dáripteý asa mańyzdy. Onyń ǵylymı-teorııalyq negizin damytý qajet...» degen bolatyn. Prezıdent mańyz bergen baǵyt boıynsha dástúrli dinimizdiń asyl qundylyqtaryn ǵylymı-teorııalyq turǵydan damytý, ata-babalarymyz ustanǵan ıslamnyń súnnıttik baǵyttaǵy hanafı mázhabyn jańǵyrtý maqsatynda jyl basynda QMDB janyndaǵy Islam ǵylymı-zertteý ınstıtýtyn ashýdy josparlaǵan bolatynbyz. Bul josparymyz oryndalyp, qýanyshqa kenelip otyrmyz. О́z kezeginde ınstıtýt ujymy Islam atyn jamylǵan túrli jamaǵattar men aǵymdardyń dinı ustanymdary men jasyryn ıdeıalaryn ǵylymı turǵydan áshkereleýge, sol arqyly elimizdiń tutastyǵy men birligine syzat túsiretin qaýip-qaterlerdiń aldyn alýǵa nazar aýdarady», dep atap ótti Naýryzbaı qajy Taǵanuly.
Sondaı-aq QMDB tóraǵasy jınalǵan qaýymǵa Islam ǵylymı-zertteý ınstıtýtynyń basshysy retinde belgili ǵalym Tóráli Qydyrdy tanystyryp, aldaǵy jumysyna tabys tiledi.
Is-sharaǵa kelgen zııaly qaýym, atalǵan ınstıtýt Islam órkenıetiniń damýyna úles qosqan ǵalym-ǵulamalardyń eńbekterin zerdelep, halqymyzdyń rýhanı tutastyǵy men yntymaq-birligin nyǵaıtýǵa serpin beretin uıymǵa aınalady degen senim bildirdi.
