Kollajdy jasaǵan – Amangeldi Qııas, «EQ»
Sybaılas jemqorlyqqa qarsy is-qımyl agenttiginiń málimetinshe, jýyrda Shymkent qalasynyń qylmystyq ister jónindegi aýdanaralyq soty «Túrkistan oblysy boıynsha dezınfeksııa ortalyǵy» ShJQ RMK fılıalynyń bas dırektory K.Tóregeldıev pen jeke kompanııanyń basshysy D.Ozyqbaevqa qatysty úkim shyǵardy. Birinshisi alaıaqtyq, para berýge ıtermeleý jáne nemquraıdylyq tanytqany, ekinshisi para berýge oqtalǵany úshin kináli dep tanylǵan.
K.Tóregeldıev atalǵan ortalyqta júrgizilip jatqan aýdıtorlyq tekserýde oń sheshim shyǵarý úshin laýazymdy tulǵalarǵa para berý degen syltaýmen D.Ozyqbaevtyń 500 myń teńge kólemindegi aqshalaı qarajatyn alaıaqtyq jolmen ıemdengeni anyqtaldy. Sondaı-aq is júzinde oryndalmaǵan jumystardyń aktilerine «oryndaldy» dep qol qoıyp, memleketke 2,2 mln teńge kóleminde zalal keltirgen.
Sot úkimimen K.Tóregeldıevke 3 jyl merzimge bas bostandyǵynan aıyrý túrindegi jaza, D.Ozyqbaevqa 7,5 mln teńge kóleminde aıyppul taǵaıyndaldy. Sonymen qatar bul adamdar memlekettik qyzmette jumys isteý quqyǵynan ómir boıyna aıyryldy. Úkim zańdy kúshine engen joq.
Sybaılas jemqorlyqqa qarsy is-qımyl agenttiginiń málimetinshe, osyǵan uqsas jaǵdaı Almaty qalasynda da oryn alǵan. Medeý aýdanynyń №2 soty «Almaty tazalyq» ShJQ MKK dırektory A.Toqtasynov pen «Qala kórkeıtý» JShS jeke kompanııasynyń dırektory S.Baıjanovty jemqorlyq jasady dep sottady.
A.Toqtasynovtyń naqty aıybyna toqtalsaq, ol Almaty qalasynyń kósheleri men trotýarlaryn kútip ustaý boıynsha qosalqy merdigerlik qyzmetter sharttaryn jasasqany jáne oryndalǵan jumystar aktilerine qol qoıǵany úshin kásipkerden 2,7 mln teńge somasynda para alǵan. Sot úkimimen oǵan 81 mln teńge somasynda aıyppul, al S.Baıjanovqa 3 jyl 6 aı merzimge bas bostandyǵynan aıyrý jazasy taǵaıyndaldy. Sot aktisi zańdy kúshine engen joq.
Túrkistan oblysynda Jer resýrstaryn basqarý departamentiniń basshysy men onyń sybaılasy sottaldy. Qalalyq sot atalǵan departament basshysy A.Myrzaevqa, onyń sybaılasy A.Baltabaevqa jáne osy departamenttiń bólim basshysy B.Jetpisovke úkim shyǵardy. Myrzaev pen Baltabaev alaıaqtyq pen para berýge ıtermelegeni, al Jetpisov para berýge oqtalǵany úshin kináli dep tanylyp otyr.
Naqtyraq aıtsaq, A.Myrzaev pen onyń sybaılasy A.Baltabaev jer ýchaskesin resimdeý úshin kásipkerdiń 18 mln teńge kólemindegi aqshalaı qarajatyn ıemdengeni anyqtalǵan. Sonymen qatar A.Myrzaev laýazymdy tulǵalarǵa jalpy qamqorlyǵy úshin para berý syltaýymen buryn kelisilgen B.Jetpisovtiń 5 mln teńgesiniń 70 myń teńge kólemindegi aqshalaı qarajatyn alaıaqtyq jolymen ıemdengen.
Sot úkimimen A.Myrzaevqa – 8 jyl, A.Baltabaevqa – 7 jyl, B.Jetpisovke 3 jyl merzimge bas bostandyǵynan aıyrý jáne memlekettik qyzmette jumys isteý quqyǵynan ómir boıyna aıyrý jazasy taǵaıyndaldy. Úkimdi jarııa etý Túrkistan qalasynyń Jer resýrstaryn basqarý jónindegi oblystyq departamenti men jer qatynastary bólimi ujymynyń qatysýymen ótti. Úkim zańdy kúshine engen joq.
Aıta keteıik, Konstıtýsııanyń 77-baby 3-tarmaǵynyń 1-tarmaqshasyna jáne Qylmystyq-prosestik kodekstiń 19-baby 1-bóligine sáıkes qylmystyq quqyq buzýshylyq jasaý boıynsha sottyń úkimi zańdy kúshine engenge deıin adam kinásiz dep esepteledi.
Bul keltirilgen mysaldarda sybaılas jemqorlyq qylmystaryn jasap, ustalǵan adamdar týraly aıtylyp otyr. Al ustalmaı júrgeni qanshama? Máselen, taıaý kúnderi Sybaılas jemqorlyqqa qarsy is-qımyl agenttiginiń Ulytaý oblysy boıynsha departamenti Qylmystyq kodekstiń 362-baby 4-bóligi 3-tarmaǵynda kózdelgen aýyr qylmys jasaǵan el turǵynynyń izdestirilip jatqany týraly aqparat taratqan edi.
Agenttiktiń málimetinshe, ol – Qaraǵandy oblysynyń týmasy, Sátbaev qalalyq polısııa bóliminiń burynǵy jedel ýákili, 24 jastaǵy Baqyt Ádil Esenjoluly. Bultartpaý sharasy – «Qamaýda ustaý». Izdeý salynǵan adam anyqtalǵan jaǵdaıda nemese onyń bolýy yqtımal orny týraly qandaı da bir aqparat bolsa, Sybaılas jemqorlyqqa qarsy is-qımyl agenttiginiń Ulytaý oblysy boıynsha departamentine habarlaýdy ótingen. «Izdeýde júrgen adamdy ustaýǵa yqpal etetin aqparat bergeni úshin syıaqy jáne anonımdilik turǵysynan kepildik beriledi» delingen aqparatta.
