Almaty qalasyndaǵy 5571 áskerı bóliminiń qatardaǵy qos jaýyngeri – Shymkent qalasynyń týmalary. Mektepten beri ajyramas dostar joǵary oqý ornyna da birge túsedi. «Áskerı qyzmet – árbir er-azamattyń Otan aldyndaǵy boryshy» dep sanaıtyn olar on segizge tola salysymen, oqýlaryn ýaqytsha toqtatyp Keńes Odaǵynyń batyry, gvardııa polkovnıgi Baýyrjan Momyshuly atyndaǵy 5571 áskerı bólimine túsedi. Qyzyǵy, qatardaǵy qos jaýynger bir ýaqytta birinshi jedel maqsattaǵy batalonǵa birinshi rotaǵa tap bolady. Qyzmet kezinde de eń alǵashqy jasaqqa da birge túsken. Bir qalada ósip, bir áskerı bólimge túsken dostardyń eske alar qyzyqty sátteri kóp.
– Bizdiń basymyzdan ótken qyzyqtar eń alǵashqy oqý-jattyǵý kezinen bastaý aldy. Osy jerge kelip dostyǵymyz odan saıyn nyǵaıa tústi. Bir rota bolǵannan keıin kún saıyn ýaqytty birge ótkizemiz. Kádimgi bir úıdiń balasyndaı etene jaqyn aralasyp kettik. Ýaqytty da óte paıdaly ári qyzyqty ótkizýge tyrysyp júrmiz. Ásirese áskerdegi estelikter bizge óte qyzyq, ózimizge qatty unap júr. Bir-birimizge qoldaý kórsetip júrgennen keıin ýaqyttyń qalaı tez ótip jatqanyn ańǵarmaı da qaldyq. Áskerge kelgenimizge de toǵyz aıdan asypty. Sanaýly kúnderden keıin úı-ishimizben, aǵaıyn-týǵanmen qaıta qaýyshamyz, – deıdi qatardaǵy Rahat Ýsmanalıev.
«Rahattyń adamgershilik qasıetine árqashan tántimin. Ol óte aqyldy. Kez kelgen qadamdy aqylǵa salyp tarazylaıdy. Aqkóńil, janashyr dosymnyń baryna maqtanamyn. Sondyqtan óz ortamyzda abyroıly. Kóńilime eń jaqyn tartqan qasıeti – bergen ýádesinde árqashan turatyny. Áskerı ómirimizde de senimge selkeý túsirmeıtin qasıeti de kóp kómegin tıgizip keledi. Dostyqtyń dánegi senim men syılastyqta jatyr. Aqtyq demim qalǵansha adal dos bolýǵa, kez kelgen jaǵdaıda kómek berýge daıynmyn», dep aǵynan jaryldy Abylaı Dinásilov.
Áskerı ómirde qosaqtasyp júrgen dostar «sarbaz bolý shydamdylyqty, tózimdilikti úıretti» deıdi. Otan aldyndaǵy jaýapkershilikti sezingen olar buryn otbasynyń atyna kir keltirmeýdi oılasa, qazir halyqtyń balasy atanyp, eldiń atyna syzat túsirmeýge serttesken. Senim men birlikti tý ete bilgen qos sarbazdyń sertterinde turyp, senimge selkeý túsirmesine kepildik mol. Biz de aınymas adal dostyqtary máńgi bolyp, abyroıly qyzmet atqaratyn adal azamat bolýyn tiledik.
