Jeńisten – jeńiske!

Saılaý aldyndaǵy kúnderde respýblıkamyzdyń óńirlerinde kóptegen kezdesýler ótkizildi. Taý qoparyp, ken qazǵan qurysh bilekti jumysshylar, júregin jas tolqynǵa jaıyp salǵan ustazdar, talaı-talaı ómirdiń shyraǵyn qaıta jaqqan dárigerler, qar sýymen talasa ósken jaýqazyndaı qaısar da qaıratty jastar, abyz aqsaqaldar sol júzdesýlerde bir ǵana sheshimge berik júgingen edi. Ol: «Biz – Elbasymen birgemiz! Nursultan Ábishulyna, HHI ǵasyrdyń myń qubylǵan saıası aǵymdarynan qazaq úshin jaıly jol tapqan qaıratkerge senemiz!»  degen. Osylaı jigerlengen. Solaı tolaǵaılanǵan. Bul qulshynys, qalyń eldiń tuńǵysh Prezıdentine arnalǵan iltıpaty osy tulǵanyń qyrýar eńbegi arqyly kelgen saıası, ekono­mıkalyq, áleýmettik sala­lardaǵy zańǵar jeńisterdiń serpini bolatyn. «Men halyqtyń qany men janynan jaralǵan perzentpin, sondyqtan da qıyn kezeńde moınyma túsken aýyr júkti moıymaı kóterýge mindettimin», dep ózine ult aldynda uly mindet júktegen azamattyń sol sertine saı bolǵandyǵynyń jarqyn kórinisi edi. «О́z halqyn súıgen adam ǵana onyń taǵdyry úshin kúıedi», degen, solaı jasaǵan janǵa arnalǵan el qurmetiniń jańǵyryǵy edi. Alashtyń aıbynyn asyrǵan tulǵa ǵana osyndaı erekshe súıispenshilikke laıyq-ty. Nursultan Ábishulyn Astana turǵyndary aıryqsha qoldady. Prezıdent elorda arqyly Qazaq­standy álemmen ulttyq sáıkestikke jarastyra alǵanyn bóle-jara aıtýmen boldy. Jańa Astana ıdeıasy halyqty aldaǵy búkil respýblıkalyq jáne ǵalamdyq qulshynystarǵa tastúıin jumyldyrǵan saıası-rýhanı qýatqa aınaldy. Elorda – ulttyq bıikke kóterilgen qaıratkerdiń murat-múddesi tabysqan shaqta tarıhı erlikke kezek keletindiginiń ǵalamat aıǵaǵy. Táýelsizdik talap etken táýekelge halyqtyń qaharmandyq rýhyn júreginde týlatqan dáýirlik tulǵalar ǵana bara alatyndyǵynyń anyq kórinisi. Jańa Astana arqyly Nursultan Ábishuly qazaq ultynyń búkil rýhanı álemin jańǵyrtty. Halyq tarıhı bıigine kóterildi. Ulttyq serpilispen birge ulttyq sana oıandy. «Jańa Astanamen – jańa ǵasyrǵa!», dep qaırattanǵan elmen birge túledik. Prezıdent – ultynyń ulaǵatyn tý etken tulǵa. Qarapaıym da qaharman qazaǵyn súıe de bilgen, kemshiligine kúıe de bilgen, sabyrmen tyńdaı da alǵan qaıratker. Onyń parasat-paıymdary ult aldyn­daǵy qaryz ben paryzǵa toly. «Qazaq tarıhynda qazaq uıala­tyn eshteńe joq», dep ótken dáýirlerdi araılandyryp berdi. «Ulttyq namys – uly uǵym», dep el qaıratyn qaırap berdi. «Qazaq dalasy – Uly Túrki eliniń qarashańyraǵy»,  dep tarıhı mártebeli tórimizdi aıqyndap berdi. Ultyn súıe júrip synaǵan, synaı júrip shyńdaǵan, ǵasyrlar uıyp tańdaǵan abyzdardy qazaq­tyń búgingi ushqyr zamanymen qaıta tabystyrdy. «Abaı sózi – qazaqtyń boıtumary», dedi. Júrekten shyǵyp, júrekke jetken sózi men ózi de eliniń oı tumaryna aınaldy. «Biz sondyqtan da Elbasyn tańdaımyz. Bul tańdaý ǵasyr tańdaýy, qazaqtyń búgini men kelesheginiń tańdaýy ekenin pash etemiz!» degen Qazaq elimen birge aldaǵy jarqyn jyldarymyzǵa qadam basyp otyrmyz. Saparymyz sátti bolsyn! Aldan SMAIYL, Parlament Májilisiniń depýtaty.