Foto: bbc.com
Al memleketimizdegi ekologııalyq ahýaldy jaqsartý úshin qoǵamda qorshaǵan ortany qorǵaýdy dáripteýdiń mańyzy zor. Bıznes ókilderi de tabıǵatty qorǵaý isine jaýapkershilikpen qaraýy qajet. Prezıdent osy máselege qatysty naqty shara qabyldaýdy Úkimet pen «Atameken» palatasyna tapsyrdy.
«Bul salaǵa ozyq tehnologııalardy keńinen engizý jumysyn jalǵastyrý qajet. Tabıǵatty lastaıtyn qaldyqtarǵa monıtorıng jasaıtyn ozyq júıe oıdaǵydaı jumys isteýge tıis.
Qazaqstannyń biregeı janýarlar jáne ósimdikter álemin saqtaý máselesi árdaıym ózekti bolyp qala bermek. Memleket aldaǵy ýaqytta da keń baıtaq dalamyzdy jáne ormanymyzdy órtten qorǵaý úshin barlyq qajetti sharany qabyldaıdy», dedi Q.Toqaev.
Memleket basshysy orman alqaptaryn kóbeıtý jolynda «Semeı ormany» sııaqty orman tuqym baǵy jobasyn ózge aımaqtarda júzege asyrýǵa nazar aýdardy.
«Qazaqstannyń tabıǵaty óte baı jáne alýan túrli. Alaıda orman-toǵaılar jerimizdiń 5 paıyzyn ǵana alyp jatyr. Tabıǵattyń ár alýandyǵyn saqtaý úshin biz orman alqaptaryn kóbeıtýimiz qajet. Bul mindet elimizdiń turaqty áleýmettik-ekonomıkalyq damýy úshin de óte mańyzdy. Men Prezıdent bolyp saılanǵan kúnnen bastap osy máselege erekshe mán berip kelemin.
Elimizdi kógaldandyrý jumysynyń qarqyny jaman emes. Toqtap qalmaı, ony jalǵastyrý qajet. «Semeı ormany» aıasynda orman tuqym baǵy bar. Bul – Ortalyq Azııadaǵy halyqaralyq ozyq talaptarǵa saı kóshet ósiretin birden-bir keshen. Osy jobany basqa da ormandy aımaqtarda júzege asyrǵan abzal.
Orman-toǵaıdy kóbeıtý búkil eldi jumyldyratyn naǵyz halyqtyq ıdeıaǵa aınalýy kerek. Sondyqtan el ishinde aýqymdy aqparattyq-túsindirý jumystaryn júrgizgen jón», dedi Prezıdent.
