Sándi de mándi saılaý

Saılaýdy baıqaýshylar qatarynda Mańǵystaý oblysyna TMD mıssııasynan 9 adam keldi. Saılaý barysynda Reseıdiń Astrahan qalasynan kelgen halyqaralyq baıqaýshy, Astrahan oblysy gýbernatory ákimshiligi jetekshisiniń orynbasary Igor EVShEVSKIIge jolyǵyp, az-kem tildesýdiń sáti tústi. – Igor Anatolevıch, Qazaqstan Respýblıkasy Prezıdentiniń kezekten tys saılaýy Mańǵystaýda qalaı ótýde? Halyqtyń qatysý belsendiligi qandaı? – Saılaý Mańǵystaýda óte joǵary deńgeıde uıym­das­tyrylǵanyna kýá boldym. Saılaý ýchaskeleri qalaı jumys jasaý kerek bolsa, olar barlyq jerde dál solaı, ıaǵnı zańdylyqtarǵa saı qyzmet atqardy. Tańerteńgi saǵat 7.00-de Qazaqstan Respýblıkasynyń Ánuranymen bastalǵan saılaý birden qarqyn alyp júre berdi. Jeksenbi kúni uıqydan keshirek turatyn adamdar bar, saılaý bastalysymen eshkim bola qoımaıtyn shyǵar dep oıla­ǵanmyn, sóıtsem qatelesippin, «áp» degennen 30-40 adam kezekke turǵanyn kórgende tańǵaldym. Ekinshi bir men kútpegen jaǵdaı – saılaýǵa, ásirese, bastapqy kezde jastardyń kóp kelýi. Men bul týraly da «tańerteńgilik úlken kisiler, qarttar kóbirek keletin bolar» dep topshylaǵanmyn. Mańǵystaýlyqtar saılaýǵa óte belsendi atsalysyp jatyr. Qaı ýchaskege barsam da, kelip-ketip jatqan adamdar. – Saılaýda oǵash oqıǵalardy baıqadyńyz ba? – Joq. О́reskel zań buzý­shylyqtar turmaq, kishigirim buzaqylyqtar da bolǵan joq. Adamdar tártipti daýys berdi, olardyń árqaısysynan kóterińki kóńil-kúıdi ańǵardym. Bir-birimen amandasyp, «merekeńmen!» dep quttyqtap jatyr. Kóbine saılaý ýchaskeleri mektepterge ornalasqandyqtan, ondaǵy komıssııa quramynda kóbine muǵalimder júr. Kelgenderdi jyly qabyldap, ne isteý kerektigin túsindirip, jymııa jol siltep júrgen olarǵa rızamyn. Astrahan qalasynyń kórshisi – Aqtaý ásem qala, al onyń turǵyndary qonaqjaı, meıirimdi eken. Osy joly oǵan da kózim jetti jáne adamdardyń mundaı kóńildi, jaıly jaıdary júzin kórý tartymdy. Keıbir saılaý ýchaskelerinde túske deıin áýen bolǵan joq, biraq saılaýshylardyń jyly júzi, aýlada uıymdastyrylǵan jármeńkeler jan-jaqty báribir kóńildi etip turdy. – Rahmet. Áńgimelesken Gúlaıym ShYNTEMIRQYZY, «Egemen Qazaqstan». Mańǵystaý oblysy.