foto: ashyq derekkózden
Úkimet otyrysynda sóz alǵan Serik Jumanǵarın jańadan jasaqtalǵan qurylymnyń maqsaty sharýalardyń máselelerin sheshý ekenin aıtty.
«Sonyń ishinde aýyl sharýashylyǵy maqsatyna berilgen, biraq jerdi paıdalanýshylar tarapynan ıgerilmeı jatqan jerlerdi memleketke qaıtarý jumystary qaıta qarqyn alady. Endi komıssııanyń mindetine jerlerdi utymdy paıdalanýdy baqylaý jáne qaıtarylǵan aýyl sharýashylyǵy maqsatyndaǵy jerlerdi qaıta bólý kiredi. Buǵan qosa jerdi alyp, ony ýaqytynda ıgerýge nemquraıdy qaraıtyn tulǵalarmen jasalǵan kelisimsharttardy birjaqty buzý praktıkasy engiziledi», dedi ol.
Onyń aıtýynsha, arnaıy komıssııanyń aınalysýymen 2022-2023 jyldary 10 mln ga ıgerilmegen aýyl sharýashylyǵy jerleri memleketke qaıtarylsa, 4,3 mln ga jer qaıta paıdalanýǵa berilgen. Bıyl qaıtarýǵa josparlanǵan 2 mln ga aýyl sharýashylyǵy jerleriniń 1,3 mln gektary qaıtarylǵan.
