Foto: Mádenıet jáne aqparat mınıstrligi
Memleket basshysy Qasym-Jomart Toqaev otbasy ınstıtýtynyń irgesin berik etýdiń mańyzyn árdaıym erekshe eksheıdi. Prezıdentimiz ótken jyly mereke qarsańynda «Otbasy ınstıtýty eńbekqorlyq, bilimpazdyq, tilektestik syndy «Adal azamatqa» tán qasıetterdi qoǵamda jan-jaqty dáripteý arqyly ulttyń jańa sapasyn qalyptastyrýǵa ólsheýsiz úles qosatynyn atap ótken edi.
Elimizde shańyraqtyń shyraıyn keltirip, eńbekte eren atanyp, qoǵamda qyraǵylyqtyń jarqyn úlgisin kórsetip júrgen ónegeli otbasylar jeterlik. Olardyń ul-qyzyn ulttyń órkendeýi jolynda jumyla júk kóterýge baýlyp júrgen janashyrlyǵy men tatý-tátti tirligin kópke tanytý, úzdik úlgi retinde kórsete bilý mańyzdy. Osyndaı qaǵıdany alǵa tartqan «Mereıli otbasy» ulttyq baıqaýynyń bıylǵy jeńimpazdary 6 qyrkúıek kúni Astanada bas qosty. Osy jyly 11 ret ótkizilgen baıqaýda ár óńirden sýyrylyp shyqqan 20 otbasy laýreat atandy. Merekelik is-sharada ónegeli otbasylar etene tanystyrylyp, qyzyl kilem boıymen júrip ótti. «Mereıli otbasylardy» marapattaý keshinde Senat tóraǵasy Máýlen Áshimbaev Memleket basshysy Qasym-Jomart Kemeluly Toqaevtyń ystyq yqylaspen joldaǵan sálemin jetkizip, quttyqtaý hatyn oqyp berdi.
- «Mereıli otbasy» baıqaýy – ulttyq qundylyqtardy jańǵyrtýǵa jol ashatyn, ózindik dástúri bar biregeı joba. Halqymyzdyń asyl qasıetterin óskeleń urpaqtyń boıyna sińirý – bárimizge ortaq mindet. Osy oraıda ár otbasy aıryqsha ról atqarady. Elimizde adal eńbegimen kópke úlgi bolyp júrgen ónegeli áýletter az emes. Búgingi saltanatty kesh – sonyń aıqyn dáleli. Bul baıqaýdaǵy árbir otbasynyń jeńisin birligi jarasqan jurtymyzdyń mereıli jetistigi dep baǵalaýǵa bolady, - delingen Prezıdenttiń quttyqtaý hatynda.
О́z sózinde Máýlen Áshimbaev Prezıdent Ulttyq quryltaıdyń otyrysynda jarııalaǵan «Adal adam – Adal eńbek – Adal tabys» tujyrymy el ıdeologııasynyń irgetasy retinde aıryqsha mańyzǵa ıe ekenin tilge tıek etti. Osydan soń sóz alǵan Mádenıet jáne aqparat mınıstri, Prezıdent janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń tóraǵasy Aıda Balaeva da jeńimpazdardy quttyqtap, zor qurmetin jetkizdi.
Laýreat atanǵandar arasynda megapolıstegi myńdaǵan otbasy arasynan alǵa shyqqan shymkenttik Sydyqovtar otbasy da bar.
Qara shańyraqtyń ıeleri Anarbaı Sydyqov aqsaqal men aqjaýlyqty Aısara Sydyqova ýnıversıtet qabyrǵasynda tanysyp, sol shaqtan beri qol ustasyp kele jatqanyna - 48 jyl. Anarbaı Sydyqov eńbekke erte aralasyp aýyl sharýashylyǵy salasynda qyzmet etse, Aısara áje beınetti ǵumyrynda uzaq jyldar kitaphanashy bolǵan. Búginde 8 perzentti jetildirip, olardan 26 nemere, 8 shóbere súıip otyrǵan, tamyrly áýlıet. Sydyqovtar jańa ǵasyrda da ulttyq salt-dástúrden ajyramaǵan. Ul-qyz tárbıleýdegi ustanymy saltpen sabaqtasyp, dástúrmen astasyp jatyr. Shymkentten shyqqan úzdik otbasy halyqaralyq báıgelerde qazaq halqynyń baı qundylyqtaryn tórge shyǵaryp keledi.
«Ulttyq qundylyq saqtalmasa el, jurt bolmaıdy. Bizge bul ósıetti ana-anamyz sińirdi. Osy ustanymdy abyroımen jalǵaı alsaq, otbasymyz úshin mereıli mártebe. Biz de óz kezegimizde izimizdi basqan urpaqtarymyzǵa adaldyq pen qazaqylyqty nasıhattaýdan talmaımyz», deıdi Anarbaı Sydyqov.
Ata-ájesiniń balǵyn shaqtan qulaqqa quıǵan ónegeli ósıetimen boıjetken áýlıettiń tuńǵysh nemeresi Jamal Anarbaı – kıim dızaıneri. Búgingi mártebeli sátte de otbasy múshelerin áspettep turǵan ulttyq obrazdar Jamaldyń qolynan shyqqan. Ismer arý Sydyqovtar tek mereke ne naýryzda ǵana emes ulttyq kıimdi kúndelikti kııýdi ádetke aınaldyrǵanyn aıtty. 20 jasar arý etno erekshelikterdi meńgerýge bala kezden den qoıǵan.
«Otbasymyz mádenıet mánin uqtyrýǵa árdaıym yqylasty. Onyń ústine ájem de, anam da – kitaphanashy. Anam mýzeıde de qyzmet atqarǵan. Ulttyq tarıhymyzdy kishkentaı kezimizden anamnyń qasynda júrip sanaǵa sińirdik. Sonda oqyp-toqyǵan kitaptar men kórgen-bilgen jádigerler meniń shyǵarmashylyǵymnyń bastaýy», dedi Jamal Anarbaı.
Bıylǵy laýreattar arasynda eń jas otbasy Soltústik Qazaqstan oblysy Aqjar aýdany, Talshyq aýylynan kelgen – Hasenovter.
Otaǵasy Nurqasym men otanasy Aqmaral Hasenovterdiń bıyl shańyraq kótergenine – 11 jyl. Nurqasym Orazuly mádenıet salasynda ter tókse, Aqmaral Qýatqyzy mektepte pedagog-psıholog qyzmetin atqarady. Oblystaǵy otbasylar arasynda oq boıy oza shyqqan Hasenovter 4 qyz tárbıelep otyr. Qyzyǵy buǵan deıin Nurqasym Hasenovtiń ata-anasy da «Mereıli otbasy» baıqaýynda baq synaǵan eken. Qoǵamdyq, qaıyrymdylyq sharalardyń ortasynan tabylatyn otbasy áleýmettik jelide de belsendi.
«Zaman talabyna saı áleýmettik jeli qoldanýshysymyn. Jelilerde otbasylyq qundylyqtardy nasıhattaýǵa kúsh salamyn. Biz bul úrdisti tanymal bolý maqsatynda emes, shańyraqtaǵy berekeli tynys-tirshilikti úgitteý maqsatynda júrgizemiz. Oblystaǵy mádenı, sporttyq sharalardyń bas-qasynan tabylý arqyly da mıssııamyzdy júzege asyryp kelemiz», dedi Nurqasym Hasenov.
Jalyndap turǵan jas otbasynyń jarasymdy ómir súrýdegi qaǵıdalaryna da qulaq túrdik.
«Er adam qaı salada bolsyn jetistikke úıdegi bereke arqyly qol jetkizedi. Al shańyraqtyń uıtqysy – áıel. Sondyqtan jubaıymnyń mártebesin árdaıym bıiktetip, qurmettep otyramyn. Úıdegi jylýlyq, meıirim qyzǵaldaq qyzdarymnyń da boıyna daryǵanyn qalaımyn», dedi Nurqasym Hasenov.
«Mereıli otbasy – 2024» baıqaýynda top jarǵan 20 otbasy arnaıy alǵys hattarmen marapattalyp, 1 mıllıon teńge syıaqyǵa ıe boldy. Meıirim saltanat qurǵan otbasy mereıli bolary sózsiz.
