Kollajdy jasaǵan – Almas MANAP, «EQ»
Máselen, Prezıdent agroónerkásip keshenine ınvestısııa tartý – óte mańyzdy mindet ekenin alǵa tartty. Bul sala memlekettiń qarjysyna ǵana ıek artyp otyrmaýy kerektigin jetkizdi. Ol úshin kommersııalyq bankterdiń qarajatyn da tartýdy tilge tıek etti. Dıqandarǵa ósimi az nesıe berýge memlekettik qarjy ınstıtýttaryn sýbsıdııalaý sharalary qolǵa alynǵany, bankter osyndaı tájirıbeni qoldanýy kerektigin eskertti. Bul óte durys usynys dep esepteımin. О́ıtkeni sharýalardyń qajetti qarajatqa tez arada qol jetkizýine, nesıe alýdy ońtaılandyrýǵa jol ashatyn tıimdi tetik qajet-aq.
Sonymen qatar Prezıdent aýyl sharýashylyǵyndaǵy taǵy bir ózekti máseleni dóp basyp aıtty. Mysaly, aýyl sharýashylyǵy maqsatyndaǵy jerlerdi ıgermeı otyrǵandar bar. Ony ne ózi paıdalanbaıdy, ne ózgege bermeıdi. Qazirgi ýaqytta paıdalanylmaı jatqan jerler memleket menshigine qaıtarylyp jatyr, biraq bul jumys áli aıaqtalǵan joq. Jeńildikpen nesıe alyp, sharýashylyqpen aınalysqysy keletin aýyl azamattary jer máselesimen betpe-bet keledi. Osy máseleni tez sheshýdi Prezıdent shegelep turyp tapsyrdy. Bul turǵyda Memleket basshysy «Bizge mundaı jer ıeleriniń qajeti joq. Úkimet pen Bas prokýratýra olarǵa qatysty máseleni myqtap qolǵa alýǵa tıis» dedi. Rasynda, aýyl sharýashylyǵyn damytý aldymen jer máselesin sheshý jumystaryn tıimdi júrgizýden bastalady.
Memleket basshysy sý sharýashylyǵy máselesimen muqııat aınalysý týraly da aıtty. Elimizdiń ońtústik óńirlerinde sý tapshylyǵy jyl saıyn seziledi. Osy oraıda sharýalar sýdy únemdep paıdalaný tehnologııalaryn qoldanýlarǵa tıis. Qazirgi ýaqytta tamshylatyp sýarý, jańbyrlatyp sýarý sııaqty únemdi ári tıimdi tásilderdi paıdalanatyn fermerler sany kóbeıip keledi. Bolashaqta jappaı osyndaı tásilge kóshý máselesi memleket tarapynan da qoldaý tabýǵa tıis.
Bir sózben aıtqanda, Prezıdent Joldaýynda elimizdiń azyq-túlik qaýipsizdigin qamtamasyz etýge yqpal etetin aýyl sharýashylyǵy salasyna erekshe nazar aýdardy. Joldaýda júktelgen mindetter oryndalyp, ilkimdi ister qolǵa alynady dep senemin.
Murat Ysqaqov,
«Agrarlyq nesıe korporasııasy» AQ basqarma tóraǵasynyń orynbasary
