Sadaqshylarda – qos qola

Sonyń ishinde qazaqtyń janyna jaqyn sporttyń biri – sadaq atý saıysy. Bul shyn máninde qazaq úshin tek sport emes, ol – óner, salamatty ómir salty jáne asa kıeli saıman. Álemde toǵyzynshy oryn alatyn aýmaǵymyzdy biz osy sadaq pen naızanyń arqasynda qorǵap qaldyq.

«Arǵymaq» at-sporttyq saýyqtyrý ke­sheninde dástúrli sadaq atýdan úshinshi jarys kúni sportshylar 30 metr qashyqtyqtan jamby atýdan ózara kim myqtyny anyq­tady. Bul jarysqa jalpy sany 120 sadaqshy qatysty. Bizdiń el atynan Jánibek Qulmyr­zaev pen Baqbergen Sálimov, Maqsat Áb­dikerimov pen Qanat Qasymhan jáne Er­bol Tápenov jarys jolyna shyǵyp, namysty qoldan bermeýge tyrysty. Aıta ketsek, Erbol Tápenov keshegi jarysta kúmis medal enshilegen bolatyn.

Túske deıin ótken irikteý jarysynda Jánibek Qulmyrzaev pen Baqbergen Sálimov synnan súrinbeı ótip, fınaldyq kezdesýlerge shyqqan bolatyn. Sol kezde biz Baqbergen Sálimovke jolyǵyp, sheshýshi syn aldyndaǵy kóńil kúıi men pikirin bildik. Onyń aıtýynsha, osy sport túrimen 3 jyldan beri aınalysyp keledi eken. Ol búgingideı saıys­ty uıymdastyryp, eldiń mereıin tasytyp otyrǵan Prezıdentimizge, basqa da jaýapty tulǵalarǵa óziniń shynaıy alǵysyn bildirdi. Biz oǵan aldaǵy synnan súrinbeı ótip, kelesi joly altyn medal taǵynyp turyp suhbat berýdi násip etsin dep tilektestik bildirdik.

Degenmen, jarystyń aty – jarys. Dúnıejúzilik kóshpeliler oıyndaryna osal sportshy kelmeıdi. Dástúrli sadaq atýdan naǵyz tartysty saıystar tústen keıin bas­taldy. О́ıtkeni ol kezde jarys jolynda kil myqtylar qalǵan edi.

30 metr jerde ilýli turǵan jambyny qaǵyp túsirý – qıynnyń qıyny. Onyń ústine bul kúni aýa raıy da jeldi bolyp, jambyny ári-beri shaıqaıdy. Bul joly sportshylarǵa tek qarsylastarymen ǵana emes, Astananyń adýyndy jelimen de arpalysýǵa týra keldi.

Tartysqa toly saıys nátıjesinde erler arasynda bas júldeni Rýmynııa eliniń ókili Alın Mıhaı Týdoran enshiledi. Júl­deli ekinshi oryn Re­seı elinen kelgen Gafýr Rahmangýlovqa buıyrdy.

Al úzdik úshtikti qatarynan eki qazaq sportshysy Jánibek Qulmyrzaev pen Baq­bergen Sálimov tú­ıindedi. Úshtiń ózi – kúsh! Qazaq eline ke­zekti eki birdeı qolany syılaǵan sport­shy­larymyzǵa alǵystan bas­qa aıtarymyz joq.

Dál osy kúni áıelder de «Jamby» nysanasy bo­ıyn­sha 30 metr qashyqtyqtan dástúrli sadaq atý synynda ózara kil myqtyny anyqtaǵan bolatyn. Qatysýshylar qataryna kóz salsań, kóshpelilerdiń urpaqtaryn da, kóshpeli emes elden kelgen saıypqyrandardy da kezdestiresiń. Muhıttyń arǵy betinen kelgen meksıkalyqtardan bastap, yqylym zamanda bizdiń ólkeden Eýropanyń ortasyna qonys aýdarǵan majar halqy ókilderine deıin bar. Jalpy, sany sadaq ónerin bes saýsaǵyndaı meńgergen 60 arý ózara synǵa tústi. Sonyń ishinde elimiz atynan Aıkórkem Batıhan, Farıza Sabyrhan, Ajar Tóleýhanova, Dınara Jaqsylyqova da óz ónerin kórsetti.

О́kinishke qaraı, bizdiń saıypqyran qyzdarymyz júldeli orynnan kórine almady. Altyn medaldy Túrkııa elinen kelgen Demırbag Aısegúl ıelense, kúmis medal majarstandyq Nýnıne Domokosqa buıyrdy. Al qola júldeni ındonezııalyq Sýrı Reno men reseılik Anna Alekseeva jeńip aldy.

Aıta ketsek, buǵan deıin «Pýta» nysanasy boıynsha áıelder arasynda qazaqstandyq Aıkórkem Batıhan qola júldege ıe bolǵan edi. Al erler arasynda Qasymhan Qanat qola medal ıelense, Jánibek Qulmyrzaev altyn medal aldy. «Qalqan» nysanasy boıynsha ótken jarysta Qasymhan Qanat qola júlde alsa, Erbol Tápenov kúmis júlde ıelendi.