Foto: t.me/ UKIMET
Jıynda Prezıdent Joldaýynda aıtylǵan mindetterdi iske asyrý sheńberinde kásipkerlikti damytýdyń ózekti máseleleri talqylandy.
Oljas Bektenov memleket ınvestısııalyq tartymdylyqty arttyrý, elimizdiń ónerkásiptik áleýetin ashý, ınfraqurylymdyq máselelerdi sheshý jáne ekonomıkanyń naqty sektoryn damytý boıynsha aýqymdy jumystar atqarylyp jatqanyn atap ótti.
Talqylaý barysynda energetıka, óńdeý ónerkásibi munaı-gaz sektory, taý-ken metallýrgııa kesheni, kólik jáne qarjy salasy, densaýlyq saqtaý, IT, týrızm salalarynyń ókilderi óz usynystaryn bildirdi. Metaldardy tereń óńdeý, munaı-gaz hımııasy jáne basqa da basym salalardaǵy jańa jobalarǵa basa nazar aýdara otyryp, otandyq taýar óndirýshilerdi qoldaý máseleleri kóterildi.
Úkimet «Atameken» Ulttyq kásiprkerlik palatasymen birlesip, taýarlardaǵy, jumystar men kórsetiletin qyzmetterdegi otandyq qamtý úlesin aıqyndaý maqsatynda jańa ádisnamany ázirleý boıynsha jumys júrgizip jatyr. Oljas Bektenov jańa tetik anaǵurlym ádil bolatynyn jáne otandyq kásiporyndardyń damýyna eleýli serpin beretinine erekshe nazar aýdardy. Al tıisti qurylymdarǵa júrgizilip jatqan jumysty jedeldetý tapsyryldy.
Kezdesýde jasandy ıntellekt júıelerin qoldanýdy keńeıtý jáne sıfrlyq tehnologııalardy damytý máseleleri qaraldy. Ekologııalyq taza, energııa únemdeıtin jáne tómen kómirtekti jobalardy iske asyrýǵa baǵyttalǵan týrızm, turǵyn úı-kommýnaldyq sharýashylyq, «jasyl» qarjylandyrý salasyn damytýdyń mańyzdy ekeni aıtyldy.
Premer-mınıstr Prezıdent alǵa qoıǵan mindetterge qol jetkizý úshin ekonomıkanyń naqty sektoryn damytýǵa bıznes ókilderin belsendi tartý qajet ekenin atap ótti.
«Memleket basshysy Qazaqstandy jan-jaqty jańǵyrtýdy belsendi júrgizýde. Ekonomıkadaǵy ósim azamattarymyzdyń turmys sapasyn jaqsartýǵa tikeleı áser etýi mańyzdy. Sonymen birge iri bıznes áleýmettik jaýapkershilikti kórsetýi kerek. Prezıdent kelesi jyldy Jumysshy mamandyqtary jyly dep jarııalaǵanyn bilesizder. Bizde iri kásipkerler kolledjderge qamqorlyq jasap, mamandar daıarlaýǵa tıisti baza quratyn sátti úlgiler bar. Bul model sonymen qatar bızneske bolashaq kadrlardy daıyndaýǵa múmkindik beredi. Jumysshy mamandyqtary jyly aıasynda mundaı tájirıbeni jandandyrý qajet», dedi Oljas Bektenov.
Aýylda kásipkerlikti damytý jáne aýyl turǵyndaryn jyl boıy jumyspen qamtý qajettigi atap ótildi.
Úkimet basshysy tıisti mınıstrlikterge bıznes ókilderi tarapynan aıtylǵan usynystardy zerdeleýdi tapsyrdy.
