Foto: Álı Ǵalym
Tarazda Halyqtyq shtab músheleri óńirdegi pedagogtar qaýymymen kezdesti. Is-sharaǵa 350-den astam adam qatysty. Shtab músheleri muǵalimniń qoǵamdaǵy róli men bedeli erekshe ekenin atap ótti. Muǵalimder bilimdi urpaq tárbıeleý arqyly eldiń órkendeýine jol ashady. Sondyqtan ustazdar qaýymy AES týraly tolyq aqparat alyp, beıbit atomdy qoldanýdyń barlyq ereksheligin túsinýi, tolǵandyrǵan suraq-saýaldarǵa jaýap alýy asa mańyzdy.
Shtab músheleri jınalǵan kópshilikti atom energetıkasyn damytý baǵytyndaǵy álemdik trendter, AES-tyń qaýipsizdigi men senimdiligin arttyrý boıynsha qolda bar quraldar týraly jan-jaqty habardar etti.
«Halyq referendýmǵa belsendi qatysyp, daýys bergen jaǵdaıda Qazaqstanda III nemese III+ býyndy atom elektr stansııasy salynady. Álemde 30-dan astam damyǵan memlekette 415 atom reaktory jumys istep tur. Búginde 15 memleket 61 atom reaktoryn salýǵa bel býdy. Energetıka salasyndaǵy mamandardyń boljamy boıynsha 2050 jylǵa qaraı atom energııasy 2 ese kóp paıdalanylady. Eger atom elektr stansııalary qaýipti bolatyn bolsa, nege damyǵan memleketter ony salýǵa qushtar bolyp otyr?», dedi Ulttyq ǵylym akademııasynyń prezıdenti Aqylbek Kúrishbaev.
Sondaı-aq Halyqtyq shtab músheleri jergilikti temirjol qyzmetkerlerimen kezdesti. Búginde 110 myńnan astam otandasymyz «Qazaqstan temir jolynda» qyzmet etedi. Olardyń eren eńbegi eldegi barlyq kólik ınfraqurylymynyń jumysyn qamtamasyz etedi. Áńgimelesý barysynda salany odan ári damytý jáne halyqtyń, sondaı-aq bıznestiń suranysyn eskere otyryp, jumys tıimdiligin arttyrý úshin QTJ-ny sapaly elektr energııamen qamtamasyz etýdiń mańyzy erekshe atap ótildi.
Osy kúni AES salýdy qoldaý jónindegi Halyqtyq shtab músheleri Merki aýylynyń turǵyndarymen – qarjylyq saýattylyqty arttyrýǵa arnalǵan «Qaryzsyz qoǵam» jáne «Aýyl amanaty» jobalaryna qatysýshylarymen kezdesti. Júzdesý barysynda olar elimizde agroónerkásip keshenin odan ári damytý jáne aýyl turǵyndaryn jumyspen qamtý deńgeıin arttyrý máseleleri boıynsha pikir almasty. Senimdi energııa kózi bolmaıynsha kóp máseleni sheshý múmkin emes.
